Қазақстан мен Ресей арасында жүк пойыздары штаттық режимде жүріп жатыр
«Қазақстан теміржолшысы» газетінің тілшісі
ТМД медиа-кеңістігінде Қазақстан өз аумағында көмір тиелген ресейлік 1700 теміржол вагонының қозғалысын бұғаттап тастаған деген жалған ақпарат таралуда. ҚР Индустрия және инфрақұрылымдық даму министрлігінің Көлік комитеті бұл хабарламалар шындыққа жанаспайтынын, яғни жалған екенін ресми түрде мәлімдеді.
Шын мәнінде, Қазақстан аумағында көмір тиелген 1700 ресейлік вагон жоқ. Ресей темір жолдарында да Қазақстанға бағытталған не болмаса Қазақстаннан шыққан көмір тиелген вагондар тіркелмеген.
– Ресей темір жолдарымен штаттық режимде жұмыс істеп жатырмыз, экспорт пен импорт бойынша ешқандай кідіріс жоқ, – деді ҚР ИИДМ Көлік комитеті теміржол инфрақұрылымы және жүк тасымалы басқармасының басшысы Сәтжан Өзбеков.
Министрлік ресейлік транзиттік вагондардың кешігуі туралы жалған ақпаратты – екі ел арасындағы көршілік қарым-қатынастарды әлсіретіп, беделін түсіруге бағытталып қасақана жасалған іс-әрекет ретінде қарастырады. Сондай-ақ, ҚР ИИДМ жалған ақпарат таратқаны үшін Қазақстан және Ресей заңнамасында да жауапкершілік көзделгенін еске салады. Жағымсыз жағдайларды болдырмас үшін бұқаралық ақпарат құралдарына осындай мазмұндағы кез-келген хабарламаны алдымен жан-жақты тексеруді ұсынады.