Баку порттары арқылы мұнай экспорты биыл ерекше қарқын алды
«Қазақстан теміржолшысы» газетінің тілшісі
Осы аптада Мемлекет басшысы Қасым-Жомарт Тоқаев Әзірбайжан Президенті Ильхам Әлиевтің шақыруымен Баку қаласына ресми сапармен барады. Екі ел басшыларының кездесуі барысында бірқатар мәселелермен қатар көлік-логистикалық саладағы ынтымақтастықты одан әрі нығайту жайы сөз болады деп күтілуде, деп хабарлайды Rail-news.kz.
Қазақстанның Баку порттары арқылы мұнай экспорты биыл ерекше қарқын алды. Қаңтар-мамыр аралығында 31,9 млн тонна мұнай экспортталған, бұл алдыңғы жылдан 5,5 пайызға көп. Қазақстанның ендігі жоспары – осы ел арқылы мұнай экспортын жылдың соңына дейін 85,5 млн тоннаға жеткізу. Осы мақсатта мұнайды әлемдік нарыққа шығарудың баламалы бағдары қарастырылуда. Бұл ретте Қазақстан, Әзірбайжан және Грузия елдері арасындағы ынтымақтастықты арттыра отырып, тараптар Қазақстан мұнайын Еуроодақ нарығына теміржол инфрақұрылымы және Баку, Батуми порттары арқылы әрі қарай Қара теңізбен Румынияға жеткізе алады. Осылайша Транскаспий бағдары Қазақстанның мұнай өнімдерін Еуроодақ нарығына жеткізудегі маңызды дәлізге айналар еді. Алайда Қазақстан мұнайын Әзірбайжан аумағы арқылы тасымалдауды реттеу үшін алдымен Қазақстанның танкерлік флотын ұлғайту қажет және осы бағытта жұмыстар жоспарлануда. ҚР Индустрия және инфрақұрылымдық даму министрлігі елімізде 10 кемеден тұратын жеке паром флотын салу көзделіп отырғанын жеткізген болатын.