Маңғыстау теміржолына биыл 621 тонна көмір жеткізілді
Маңғыстау облысы бойынша меншікті тілші
Түбек теміржолында жылыту кезеңі қазан айында басталды. Десе де, теміржолшылар отын қорын қамдауға ерте кірісті. Бүгінге дейін 621 тонна қатты отын жеткізілген.
Сала мамандарының айтуынша, алда тағы да 207 тонна алынады. Сонымен биылғы науқанға жоспар 828 тоннаны құрамақ. Оған қоса қоймада өткен жылдан қалған 320 тонна қалдық көмір де бар. Демек, биылғы қыс сұранысын өтеуге жетеді деп болжап отыр. Маңғыстаудан бірнеше жолаушы пойызы қатынайды. Солардың ішінде «Маңғыстау-Семей» бағытындағы жолаушылар пойызы көмірді көп қажет етеді. Үш күн жол жүретіндіктен бір рейске орта есеппен 3 тоннадай көмір кетеді екен. Қалған бағыттар бойынша 1 тоннадай көмір жағылады. Ауа райы суытып аяз болса, әрине барлық бағытта отын тұтыну мөлшері артары сөзсіз.
– Бүгінде жолаушы пойыздары жып-жылы. «Батыс» жолаушылар тасымалының, «Сарыарқа» қалааралық тасымалының және «ОтпанЛогистик» жергілікті жекеменшік компанияның пойыздары қатынайды. Күнделікті осы компаниялар жасақтайтын Маңғыстау-Семей, Маңғыстау-Атырау-Ақтөбе, Маңғыстау-Бейнеу, Маңғыстау-Ақтөбе пойыздарына қажет көмір берілуде. Рейс алдында әр вагонға 100-150 келіден салынуда. Күн суыта бастаса, көтерілетін болады. Бір вагонға 400 келіге дейін көмір сыяды, – дейді «Вагонсервис» АҚ Маңғыстау телімінің бригадирі Асқар Жанатбаев.
Жауапты маманның сөзінше, отын тасуға арналған екі трактор жүргізушісімен және көмірмен жабдықтаушы бес адам барлық жұмысты игеруде.