Көмір жеткізуде кедергі жоқ
Түркістан облысы бойынша меншікті тілші
Арыс қаласының жылыту маусымына дайындығы түпкілікті шешілген. Көмірмен жылытылатын қазандықтар қалыпты жағдайда жұмыс істеп тұр.
Алты ауылдық округпен қоса есептегенде 80 мыңға жуық тұрғыны бар қаланы жылыту маусымына дайындауда теміржолшылардың еңбегі ерен.
Әсіресе, Арыс станциясындағы көмір базасы мен ондағы жауапты мамандардың еңбегі ауыз толтырып айтарлықтай. Станцияның бас инженері Мейірбек Мырзахметовтің айтуынша, мекемеге қарасты 4 көмір базасы арқылы қыркүйектің 1-не дейін 56 649 тонна қатты отын қаладағы әлеуметтік нысандарға таратылған. Ал жыл басынан бері Арысқа жеткізілген 821 вагон көмір дер кезінде түсірілген.
«Бірінші кезекте станцияның көмір базасына жеткен вагонның тұрып қалмауын қамтамасыз етіп, яғни, вагонның дер кезінде босатылуын үйлестіреміз. Әріптестеріміздің әбжіл әрекет, шебер қимылының нәтижесінде вагон өңдеуде кешеуілдеуде кедергі де жоқ», – дейді бас инженер Мейірбек Әділбекұлы.
«Арыс жылу» мекемесіне қарасты 8 қазандық (оның 2-і көмірмен, 6-ы дизель отынымен жылытылады), бюджеттік мекемелерге қарасты жалпы қазандықтар саны – 82 дана. Қала әкімдігі өкілдерінің айтуынша, бүгінде Арыс қаласының тұрғындары қажет ететін 54 600 тонна көмір қала бойынша 3 нүктеден таратылуда.