Он бір айда 230 млн тонна жүк тиелді

Үстіміздегі жылдың он бір айында «ҚТЖ» ҰК» АҚ желісі бойынша 230 млн тонна жүк тиелді. Оның 154 млн тонна жүгі республика ішіне жөнелтіліп, бұл көрсеткіш өткен жылдың есепті мерзімімен салыстырғанда 2,7 млн тоннаға артық шыққан. Ал экспортталғаны – 77,8 млн тонна.

Жүк тиелімінің басым бөлігін, яғни 97,7 млн тоннасын көмір тиелімі құрап отыр. Бұл көрсеткіш былтырғы жылдың есепті мерзімімен салыстырғанда 2,1 млн тоннаға жоғары болып отыр. Осы ретте қатты отынның 67,6 млн тоннасы республика ішіне таратылса, экспортқа жөнелтілгені 30 млн тонна шамасында. Осы арада қазақстандық қатты отынға шетелдіктер тарапынан сұраныстың 5,2% артқаны байқалып отыр.  

Астық тасымалына келсек, оның тиелімі 8,7 млн тоннаны құрап, өткен жыл көрсеткішінен 9% артқан. Ал экспорттық тасымал көлемінің 2021 жылға қарағанда 15% немесе 6,9 млн тоннаны құрағанын атар едік. Тартылған астық тиелімінің де жалпы көлемі 26% артып, 2,7 млн тоннаны құрағанын, соның ішінде экспорттың 53% дейін өскені белгілі болып отыр. Осыдан-ақ, әлеуметтік басымдықтағы жүктер тиелімінің биыл жыл басынан бері артқаны байқалып отыр.  

2022 жылдың 11 айында 17,7 млн тонна темір кені және 4,1 млн тонна қара металл тасымалданған. Биыл түсті кен мен күкірт шикізаты тиелімінің де 2% артып, 20 млн тонна шамасын, мұнай жүктерінің 6,2% өсіп, 17 млн тонна шамасын құрағаны белгілі болып отыр. Өсім көрсеткіші химиялық тыңайтқыштар мен құрылыс жүктері тиелімінде де байқалып отыр. Жалпы қаңтар-қараша аралығында желі бойынша пайдаланымдағы жүк айналымы 6% артып, 230,3 млрд т-км неттоны құраған.  

Осы жылдың он бір айындағы жолаушылар тасымалына келсек, бұл бағытта да оң динамика байқалып отыр. Жыл басынан бері 13 млн шамасында жолаушы тасымалданып, бұл көрсеткіш өткен жылға қарағанда 23% артқан.