Биыл Транскаспий дәлізімен 2 млн тонна жүк тасымалданған
«Қазақстан теміржолшысы» газетінің тілшісі
Қазақстанның Транскаспийлік халықаралық көлік бағдарын дамыту шеңберіндегі мүмкіндіктері мен жоспарлары 20 қазан күні Гаагада «Орта дәліз – Еуропа үшін жаңа мүмкіндіктер» тақырыбында өткен дөңгелек үстелде талқыланды.
Алқалы жиында Көлік комитетінің төрағасы Алтай Әлі Қазақстанның Транскаспий халықаралық көлік бағытын дамыту шеңберіндегі мүмкіндіктері мен жоспарлары туралы айтып берді. Сондай-ақ еуропалық компанияларға Ақтау портындағы контейнерлік хабтың құрылысы, теңіз флотын дамыту, Достық-Мойынты және Алматы станцияларының теміржол торабынан айналып өтетін теміржол желісін салуды қоса алғанда, маршруттағы инвестициялық жобалар ұсынылды.
Іс-шараға ҚР Нидерланды Корольдігіндегі Төтенше және Өкілетті Елшісі Асқар Жұмағалиев, Әзербайжан, Грузия және Түркиядағы көлік мәселелеріне жауапты ведомстволар мен елшіліктердің өкілдері шақырылды. Айта кетерлігі, Транскаспий халықаралық көлік бағыты – Қытай мен Еуропа елдерін байланыстыратын негізгі торап. Биыл 9 айда Транскаспий халықаралық көлік бағыты бойынша 2 млн тоннаға жуық жүк тасымалданған.