ТХКБ-ны дамыту келісімі ратификацияланды
«Қазақстан теміржолшысы» газетінің тілшісі
Сенат «Қазақстан мен Қытай Үкіметтері арасындағы Транскаспий халықаралық көлік бағдарын дамыту жөніндегі келісімді ратификациялау туралы» заңды мақұлдады. Келісімнің мақсаты – аталған бағдар бойынша мультимодальды тасымалдауды дамыту үшін автомобиль, теңіз және теміржол көлік түрлерінің басымдығын тиімді пайдалануға жәрдемдесу.
Сонымен қатар келісім тараптарының аумақтары арқылы жүктерді тасымалдау үшін қолайлы жағдайлар жасауды көздейді. Заңда көліктің реттеуші салаларындағы ведомстволар мен кәсіпорындар арасындағы ынтымақтастықты нығайту, көлік бағытының тұрақты және тиімді жұмыс істеуін қолдау үшін даму ортасын бірлесіп қалыптастыру, логистикалық және көлік операцияларын оңтайландыру, тасымалдау уақытын қысқарту, көрсетілетін қызметтердің сапасын арттыру көзделеді. Келісім Транскаспий халықаралық көлік бағыты бойынша жүк тасымалдау көлемін ұлғайтуға және Қазақстан мен Қытай арасындағы сауда-экономикалық қатынастардың одан әрі дамуын жақсартуға мүмкіндік береді.
Сонымен қатар Сенат «Қазақстан мен Қытай Үкіметтері арасындағы ТХКБ-ны, оның ішінде Қытай-Еуропа қатынасындағы контейнерлік пойыздар үшін дамыту жөніндегі келісімді ратификациялау туралы» заңды мақұлдады. Заңда аталған бағдар бойынша жүктерді тасымалдаудың жыл сайынғы әлеуетті көлемін болжау, жылжымалы құрамды қадағалау жөніндегі деректермен алмасу және тараптардың аумақтарында контейнерлік пойыздар үшін экспорттық-импорттық, транзиттік тасымалдарды ұлғайту жөніндегі ынтымақтастықты дамыту көзделеді.