Ақмола бөлімшесі 2 млн тоннадан астам астықты тасымалдады
2024 жылдың 7 айында Ақмола жүк тасымалдау бөлімшесінің теміржолшылары 2 млн тоннадан астам астықты тасымалдады, деп хабарлайды Rail-news.kz.
Оның ішінде еліміз бойынша 340 мың тоннадан астамы тасымалданса, бұл 2023 жылдың сәйкес кезеңімен салыстырғанда 14% жоғары. Экспортқа 1,7 млн тоннасы жөнелтілді. Қаңтар – шілде айлары кезеңінде 250 мың тоннадан астам ұнтақ өнімдерін тиеу қамтамасыз етілді. Өткен жылға қарағанда өсім 29%.
Дәстүр бойынша астық пен ұнтақ өнімдері жабық вагондармен және астық тасымалдаушылармен Орталық Азия елдеріне, Иранға, Ауғанстанға, Қытайға және Ресейге, контейнерлерде - Вьетнамға, Қытайға, Түркияға, Италияға және басқа елдерге жөнелтіледі.
Астық жүктерінің қозғалу жылдамдығын арттыру үшін маршруттық шаттл-пойыздар қалыптастырылады. Биыл Ақмола өңірінен 380 астам астық маршруттары жөнелтілді. Теміржолшылар атап өткендей, парктің тиімді әрі ұтымды жұмысы жолға қойылғанда ғана жаңа өнім тасымалданады, жылжымалы құрамның тапшылығы болмайды.
Өңірлерде және ҚТЖ орталық деңгейінде биылғы астықты тасымалдауды ұйымдастыру үшін астық штабтары мен топтарының жұмысы күшейтілді. Барлық туындаған мәселелер жедел шешіледі.
Штаб апта сайын мүдделі мемлекеттік органдар өкілдерінің, астық трейдерлерінің және ірі жүк жөнелтушілердің қатысуымен кеңестер өткізіп келеді.