Көмір тиеуде кідіріс жоқ

Осы аптада Үкімет отырысында алдағы жылу беру маусымына дайындық барысы қаралды. ҚР Көлік министрі Марат Қарабаев негізгі көмір тиейтін станцияларына апаратын 103 км жуық теміржол жөндеуден өткенін жеткізді.  

Атап айтқанда, көмірді жеткізу кезінде пойыздар қозғалысының қауіпсіздігін қамтамасыз ету үшін жалпы ұзындығы 102,7 шақырымды құрайтын негізгі көмір тиеу станциялары Қызылжар, Дегелең, Үшқұлын, Нұра және Екібастұзға апаратын жолдарда жөндеу жұмыстары жүргізілген. Жылу беру маусымына дайындық аясында көмірді уақытылы тиеуді қамтамасыз ету үшін мүдделі мемлекеттік органдармен және ұйымдармен бірлесіп тиісті шаралар атқарылып жатыр. Көмірді жоғары жылдамдықпен – тәулігіне 700 км-ге дейін жеткізуді қамтамасыз ететін тасымалдауды бағдарлау жүйесі әзірленген. Қараша-желтоқсанда жүктемені азайту үшін әкімдіктермен бірлесіп, жаз айларында көмір қорын арттыру жұмыстары жүргізілуде. Сонымен қатар көмірмен қамтамасыз ету мәселелеріне жедел ден қою және шешу үшін тұрақты штаб жұмыс істейді.

Коммуналдық-тұрмыстық секторды 3 айда көмірмен қамтамасыз ету жөніндегі жоспар 108%-ға орындалған. 1 мамырдан бастап 15 тамызға дейін теміржол көлігімен 17 млн тонна көмір тасымалданып, оның 1 млн тоннасы коммуналды-тұрмыстық секторға, 16 млн тонна энергетикалық кәсіпорындарға жеткізілген. Жыл сайынғы деректерге сәйкес республика ішіндегі көмір тасымалының жалпы қажеттілігі 70 млн тоннадан асады. Орташа ай сайынғы көмір тиеу көлемі – 5,5 млн тонна.  

«Бүгінгі күні энергетикалық кәсіпорындардағы көмір қорының көлемі 3,7 млн тоннаға тең. Коммуналды-тұрмыстық секторды қамтамасыз етуге ерекше көңіл бөлінуде. Жылу беру маусымының 3 айында нақты тасымалдау көрсеткіштері жоспарға 108% құрады», – деді көлік министрі Марат Қарабаев.

2024 жылы көмір тасымалының жылжымалы құрамы 185 локомотивпен жаңартылды. Қазіргі уақытта тасымалдауға 20 мыңнан астам ашық вагон тартылған, оның ішінде 11 мыңы коммуналды-тұрмыстық көмірді тасымалдауға, 9 мыңы энергетика саласына арналған. Сонымен қатар 3 мыңға дейін жеке операторлардың вагондарын пайдалану мүмкіндігі бар.  

«Ұлттық оператор локомотивтерінің жалпы саны 1 мың 807 бірлікті құрайды. Жылжымалы құрамның жұмысқа қабілеттілігін қамтамасыз ету мақсатында тұрақты түрде жаңарту жұмыстары жүргізілуде, биыл 185 локомотив сатып алынды. Жалпы жұмылдырылған жылжымалы құрам қажетті көлемді тасымалдауды толық қамтамасыз етеді», – деп атап өтті Марат Қарабаев.

Жылу беру маусымына дайындық барысы бойынша Премьер-министр бірқатар тапсырмалар берді: Көлік министрлігі, Қазақстан темір жолы компаниясы және өңір әкімдіктері бекітілген кестеге сәйкес коммуналды-тұрмыстық көмір мен мазут көлемін уақытылы жеткізу бойынша шаралар қабылдауы тиіс.