Ақмола ЖТ бөлімшесінде жедел астық топтары тәулік бойы жұмыс істеуде
Осы жылдың 1 қыркүйегінен бастап Ақмола жүк тасымалдау бөлімшесінде жедел астық топтары тәулік бойы жұмыс режиміне көшті, деп хабарлайды Rail-news.kz.
Топ отырыстары күн сайын экспорттаушылардың, астық трейдерлерінің және облыстық әкімдік өкілдерінің қатысуымен өткізіледі. Жүк жөнелтушілер астығын тасымалдау бойынша және алушылардың туындайтын барлық мәселелері жедел түрде шешіледі.
Бөлімшеде астықты үздіксіз тасымалдауды қамтамасыз ету үшін ұйымдастыру жұмыстары жүргізілді. Астықты жаппай жөнелту кезеңінде орта есеппен тәулік сайын 37 маневрлік локомотив жұмыс істейтін болады, бұл тасымалдауды қамтамасыз ету үшін жеткілікті.
Қыркүйек айының басынан бастап бөлімше желісі бойынша 137 мың тоннадан астам астық тиелді, оның 79% экспортқа жөнелтілсе, қалғаны елдің оңтүстік өңірлеріне жеткізілді. Ақмола астығы Орталық Азия, Иран, ҚХР және Ауғанстан елдеріне экспортталады.
Жүк жөнелтушілердің бос вагондарды тасымалдауға және жүктер тасымалын қамтамасыз етуге ұсынған барлық өтінімдері толық көлемде орындалуда.