KGLF-2024: Астық логистикасы сөз болды

Астана қаласында «KAZAKH GRAIN & LOGISTIC FORUM-2024» деген атаумен Қазақстанның астық нарығы және көлік логистикасына арналған екі күндік ауқымды форум өтіп жатыр. Кеше басталған жиынның бірінші күні астық тақырыбы қозғалса, екінші күні логистика, тасымал мәселесі сөз болмақ.

Конференцияға астық нарығының көшбасшылары – Қытай, Өзбекстан, Түркия, Швейцария, Эстония және Еуропа мен Азияның бірқатар елдерінен ірі ауыл шаруашылығы өнімдерін өндірушілер, экспорттаушылар мен импорттаушылар, қайта өңдеушілер, мемлекеттік органдардан, сондай-ақ логистикалық және заңгерлік компаниялардан барлығы 100-ден астам делегат келді.  

Жиынның алғашқы күні кішігірім көрмемен ашылды. Конференция қонақтары тақырыпқа қатысты экспонаттармен, соның ішінде дәнді дақылдардың сұрып түрлерімен және тағы да басқа өнімдермен танысты.  

– Екі күнге созылатын конференцияның тақырыбы өзектілігімен тартымды бола түсуде, сондықтан оған мүдделі тараптар қатысып, қызықты өтуде. Астық тақырыбына арналған алғашқы күнде жетекші сала мамандары жаһандық және аймақтық үдерістерді, соның ішінде Қытайдың өсіп келе жатқан ықпалына баса назар аудара отырып, макроэкономикалық және геосаяси аспектілерді, мемлекеттік реттеудің нюанстары, ағымдағы теңгерімдерді ұсыну, баға болжамдары, тауашалық дақылдар туралы және тағы да басқа жайттарды әңгіме өзегіне айналдырды. Бұл күні ағымдағы маусымның қиын жағдайында Қазақстанның астық нарығының қалай дамитыны туралы болжамдар мен талқылаулар қызықты болды. Сондай-ақ сыртқы сауда қызметінің аспектілері қарастырылатын заңгерлік семинар өтті, – дейді ұйымдастырушылардың бірі «АПК-Информ Азия»ЖШС директоры Елена Чередниченко.  

Форумның екінші күні логистикаға арналмақ. Атап айтқанда ішкі жүк ағындары, Қазақстанның транзиттік әлеуеті мен инфрақұрылымының дамуы, биылғы маусымдағы астық логистикасының ерекшеліктері, теміржол тасымалы саласындағы проблемалар мен оларды шешу жолдары талқыланбақ. Арнайы тақырып аясында қазіргі геосаяси жағдайларда рөлі айтарлықтай өскен Транскаспий халықаралық көлік маршрутының (ТХКМ) даму перспективалары қарастырылмақ. Ұйымдастырушылар саланың жетекші спикерлерінен алынған ақпарат және конференциядағы талқылаулар астық сегментіндегі және логистикадағы мәселелердің тиімді шешімдерін әзірлеудің басты құралына айналады деп болжап отыр.