Қазақстан жүк тасымалы бойынша Грузиямен байланыстарын нығайтуда
2024 жылдың қорытындысы бойынша Қазақстаннан Грузияға теміржол арқылы жүк тасымалдау көлемі 4,7 млн тоннаны құрап, 2023 жылмен салыстырғанда 32%-ға артты. Бұл туралы Қазақстан мен Грузия Премьер-министрлерінің келіссөздері нәтижесінде ҚР көлік министрі Марат Қарабаев айтты, деп хабарлайды Rail-news.kz.
Көлік байланыстарын нығайтудағы маңызды қадамдардың бірі Грузияның Поти портында қазақстандық терминалдың құрылысының басталуы болды. Жылына 120 мың контейнер өткізуге қауқарлы терминалға қазақстандық жеке бизнес тарапынан $30 млн көлемінде инвестиция құйылып, оны 2025 жылдың сәуір айында аяқтау жоспарлануда.
«Қазақстан мен Грузия арасындағы көлік және логистика саласындағы өзара қарым-қатынастар өте белсенді қарқынмен дамып келеді. Мұның дәлелі ретінде жүк тасымалдарының өсуі де айқын. 2024 жылдың қорытындысы бойынша теміржолмен тасымалданған жүк көлемі 4,7 млн тоннаны құрады, бұл 2023 жылмен салыстырғанда 32%-ға артты. Автомобиль тасымалдарында да оң көрсеткіштер бар. 17%-ға өсім байқалды, жалпы көлемі 42 мың тонна. Қазіргі уақытта барлық қазақстандық әуе компаниялары Грузияға тұрақты жолаушы рейстерін орындап жатыр. Рейстер саны 15, ал туристік маусымда рейстер саны 40-тан асады», - деп атап өтті ҚР көлік министрі Марат Қарабаев.