ҚТЖ-да биылғы егін астығын тасымалдау талқыланды
ҚТЖ-да биылғы егін астығын тасымалдауды ұйымдастыру бойынша жедел астық штабының отырысы өтті, деп хабарлайды Rail-news.kz.
Жиналыс Zoom платформасында бейнеконференция форматында болды. Оған 100астам экспорттаушылар, трейдерлер және вагон паркінің операторлары қатысты. Сондай-ақ, Көлік министрлігінің Теміржол және су көлігі комитетінің өкілдері шақырылды.
Кеңеске қатысушылар инфрақұрылым мен вагон паркінің ең жоғары тасымалдау көлеміне дайындығын талқылады. Вагондардың жиналып қалуына және станцияларда тоқтап тұруына жол бермеу үшін бір ай ішінде тиеуді біркелкі бөлуге ерекше назар аударылды.
2025 жылдың қыркүйегінен 2026 жылдың тамызына дейін ҚТЖ желісі бойынша 15 млн тоннадан астам – рекордтық көлем астық тасымалданды. Экспортқа 11,8 млн тонна, Орталық Азия елдеріне–7,6 млн тонна жөнелтілді. Ауғанстанға тасымалдау үш есеге – 1 млн тоннаға дейін өсті.
2026 жылғы тамызда ҚТЖ желісі бойынша шамамен 1,2 млн тонна астық тасымалданды, бұл өткен жылдың сәйкес кезеңімен салыстырғанда 35% артық. Экспортқа 895 мың тонна жөнелтілді, өсім 46% құрады. Ішкі нарыққа 262 мың тонна бағытталды. Ұнтақ өнімдерін тасымалдау 18% өсті.
Желіде астық тасымалдау үшін 15,2 мыңға жуық астық тасымалдаушы және 17,1 мың жабық вагон тартылды. Өтінімдерді уақтылы беру және қолда бар вагон паркін біркелкі түсіру жағдайында биылғы егінді әкету үшін жеткілікті.
Элеваторлар мен кірме жолдар иелеріне тәулік бойы жұмыс істеуді қамтамасыз ету, ал жүк жөнелтушілерге көлемді алдын ала жоспарлау және тасымалдауға уақтылы өтінім беру ұсынылды.
Вагон меншік иелері мен операторларына айдың бірінші жартысында астықты тиеу кезінде экспорттаушылар үшін ынталандырушы жеңілдіктер қарастыруға кеңес берілді. Бұл көлемді біркелкі бөлуге және үшінші онкүндікте теміржол инфрақұрылымына жүктемені азайтуға мүмкіндік береді.
Тасымалдауды жедел үйлестіру үшін ҚТЖ бөлімшелері мен еншілес ұйымдарының, вагон паркі, теңіз порттары, астық одақтары операторларының және экспорттаушылардың қатысуымен астық штабы жұмысын жалғастырады.