Қазақстан мен Беларусь арасындағы теміржол тасымалы 19 пайызға өсті
Қазақстан мен Беларусь арасындағы теміржол арқылы жүк тасымалдау көлемі артты. 2026 жылдың қаңтар-шілде айларында екі ел арасындағы теміржол тасымалы өткен жылдың сәйкес кезеңімен салыстырғанда 18,7 пайызға өсіп, 4,8 миллион тоннаға жетті.Бұл туралы Қазақстан үкіметінің баспасөз қызметі мәлімдеді, деп хабарлайды Rail-news.kz.
Аталған көрсеткіштер Қазақстан Премьер-министрі Олжас Бектенов пен Беларусь Премьер-министрі Александр Турчиннің Минскідегі келіссөздері барысында айтылды. Кездесуде тараптар екі ел арасындағы логистикалық бағыттарды одан әрі дамыту мәселесін талқылады.
Келіссөздер барысында Қазақстан мен Беларусьтің көлік және транзит саласындағы ынтымақтастығында оң динамика қалыптасып отырғаны атап өтілді.
Көлік және транзит екі мемлекет арасындағы экономикалық байланыстардың негізгі бағыттарының бірі саналады. Қолданыстағы келісімдер жүк және жолаушы тасымалын дамытуға, теміржолдардың жұмысын үйлестіруге, тариф саясаты бойынша өзара іс-қимылды күшейтуге және қосымша транзиттік жүк ағындарын тартуға мүмкіндік береді.
Қазақстан мен Беларусь арасындағы теміржол қатынасының өсуі екі елдің транзиттік әлеуетін тиімді пайдалануға және Еуразия кеңістігіндегі логистикалық байланыстарды одан әрі кеңейтуге жол ашады.