Қозғалыс кестесін жүргізу автоматтандырылады

ҚТЖ пойыздар қозғалысы кестесін жүргізудің автоматтандырылған нұсқасын енгізуде. Тасымалды басқарудың Солтүстік өңірлік орталығы бойынша Қырқыншы-Ерейментау және Қырқыншы-Қарағанды-Сұрыптау екі диспетчерлік телімінің станцияларында алғаш рет сондай автоматтандырылған нұсқа енгізілді.  

Жоба 9 ай бойына жүзеге асырылады. Енді пойыз диспетчерлеріне қағазға қолмен кесте ресімдеудің, станция кезекшілеріне ДУ-2 станциялық журналын және кестенің тәуліктік жоспарын толтырудың қажеті жоқ. Пойыздар қозғалысы кестесін жүргізудің автоматтандырылған нұсқасын пайдалану ақпараттың жеделділігі мен дәйектілігін арттыруға, қағазсыз технологияны енгізуге, қозғалыс кестесін қолмен жасаудан бас тартуға мүмкіндік береді.  

Аталған жоба екі кезеңде жүзеге асырылды. Біріншісінде сынақ Қырқыншы-Ерейментау телімінде өтті. Жұмыстың жаңа форматында алғаш жұмыс істегендер – Қырқыншы, Сарыоба, Еркіншілік, Едіге, Ерейментау станциялары бойынша кезекшілер болды. Екінші кезең пойыздар қозғалысы тығыз, күрделі телімдердің бірі – Қырқыншы-Қарағанды-Сұрыптау телімінде өтті. Бұл ретте №42 қосыны, Бабатай, Аршалы, Анар, Сарыбел, Ақтасты, Шоқай, Мырза, Нұра, Көкпекті және Қарағанды-Сұрыптау станцияларының кезекшілері мен пойыз диспетчерлері өздерінің жоғары кәсібиліктерін көрсетті. Автоматтандырылған жұмыс орындарын ұйымдастыру жұмыстары Қарағанды жол бөлімшесінің 7 станциясында жүргізілді. Пойыз диспетчерлерінің жұмыс орындары қосымша оргтехникамен жабдықталып, 85 маманға оқыту вебинарлары өткізілді.  

Қазіргі таңда жоба Қарағанды-Сұрыптау-Құлайғыр диспетчерлік телімінде жүзеге асырылуда және оны Құлайғыр-Мойынты телімінде енгізу бойынша дайындық жұмыстары жасалуда.  

 – Осы жылдың алғашқы жартыжылдығының соңына дейін тағы 6 диспетчерлік телімде осы жобаны енгізу көзделуде. Осылайша Солтүстік өңірлік орталықтың барлық жол бөлімшелері қамтылады. Ал екінші жартыжылдықта эстафетаны тасымалды басқару бойынша Оңтүстік және Батыс өңірлік орталықтарының диспетчерлік телімдері қабылдап алады. Бұл жұмыстар диспетчерлік аппараттың күрделі жұмыс бөлігін жою арқылы тасымал процесін басқару деңгейін арттыруға бағытталған, – дейді Қырқыншы-Қарағанды-Сұрыптау диспетчерлік телімінің Солтүстік өңірлік пойыздар қозғалысын басқару Өңірлік орталығының пойыз диспетчері Ақтайлақ Бұйрабеков.