Кадрдың қадірі артуда
«Қазақстан теміржолшысы» газетінің тілшісі
Жуырда өткен «Магистраль» сарапшылар форумы биылғы жұмысшы мамандықтар жылында адами капиталды дамыту мәселесін талқыға салып, сарапшылар теміржол саласына кадр дайындау, цифрландыру және жұмысшыларды қолдау мәселелерін көтерді.
«ҚТЖ» ҰК» АҚ Кадр қызметі департаментінің HR бизнес-серіктесі Алма Сәулебаеваның айтуынша, 2023 жылы компания қызметкерлерінің әл-ауқатын жақсартуға 20 млрд теңге, ал былтыр 16 млрд теңге бөлінді.
– Компания қызметкерлерінің 98 пайызы – өндірістік персонал. Сондықтан жұмысшы мамандықтар жылы бізде тек бір жылда ғана емес, үнемі бізбен бірге, тікелей қатысы бар. Әлеуметтік тұрақтылық индексі рейтингі бойынша ҚТЖ жоғары көрсеткішке ие. Себебі компания өз қызметкерлерінің қолайлы жұмыс істеуіне барлық жағдайды жасап отыр. 2022 жылы біз темір жолдағы санитарлық тұрмыстық жағдайды жақсартуға 3,5 млрд теңге бөлдік. Бұл сома 2023 жылы бірнеше есеге артты, – деді Алма Сәулебаева.
Сонымен қатар жұмысшылардың өз ісіне деген ынтасын арттырып, теміржолда кадр тұрақтылығын нығайта түсу үшін өткен жылы ұлттық компанияда 23 жаңа марапат пайда болған. Биыл жұмыс өтіліне қарай бір реттік төлемдер беру жоспарлануда. Мысалы жұмыс өтілі 10 жыл адамдарға 100 мың теңге, 20 жыл істеген теміржолшыларға 200 мың теңгеден, 30 жылдық еңбегі бар адамдарға 300 мың теңге беру көзделуде.
Жалпы теміржол саласында 140 мың адам еңбек етсе, соның 120 мыңы ҚТЖ-да жұмыс істейді екен. Болашақта теміржол саласына цифрландыру, роботтандыру және жасанды интеллектпен байланысты 5-6 жаңа мамандықтар енгізу жоспары бар.