Бәйгеқұм станциясында автоматтандырылған шлагбаум орнатылуда

Қызылорда белгі беру және байланыс дистанциясының теміржолшылары Бәйгеқұм станциясындағы теміржол өткеліне автоматтандырылған, заманауи үлгідегі шлагбаум орнатып, оның байланыс, белгі беру құрылғыларын жаңартып, жаңғырту жұмыстарын сәтті жасап шықты.

Атқарылып жатқан бұл жұмыстар алдағы уақытта өткелдегі қозғалысты тәртіпке келтіріп, пойыздардың және автокөліктердің қауіпсіз қозғалысын қамтамасыз ететін болады. Соңғы жылдары Бәйгеқұм станциясы маңындағы сулы-нулы аумақтар табиғатының көркемдігімен тартып, жергілікті тұрғындар мен сырттан келушілер үшін жазғы демалыс орнына айналып келеді. Алайда демалыс маусымындағы көлік легінің күрт артуы теміржол өткелдерінде қауіп төндіруі мүмкін жағдайларды тудырып отыр.  

Дәл осы 20-бекет пен Бәйгеқұм станциясы арасындағы 2922 шақырымдық теміржол өткелінен демалушылар автокөлікпен жиі өтеді. Көліктер саны артқан сайын өткел маңында кептеліс орын алып, бұл магистральдық бағытпен жүретін жолаушы және жүк пойыздарының қозғалыс қауіпсіздігіне қатер төндіру ықтималдығын арттыруда. Осыған байланысты ҚТЖ тарапынан теміржол өткелі күзетілетін өткел санатына ауыстыру жөнінде шешім қабылданды. Бұл бастама пойыздар қозғалысының қауіпсіздігін арттырып қана қоймай, автокөлік жүргізушілерінің де тәртіппен жүруіне мүмкіндік береді деп бағаланып отыр.  

Аталған шешімге сәйкес Қызылорда магистральдық желі бөлімшесіне қарасты Қызылорда белгі беру және байланыс дистанциясының теміржолшылары өткелге автоматты түрде басқарылатын шлагбаум орнату жұмыстарын қолға алды. Жаңа үлгідегі өтпелі сигнал беру құрылғылары, жарық сигналдары, дайын командалық аппаратуралар орнатылып жатыр. Ескеретін нәрсе, өткен жолы осы теміржол өткелі Қызылорда жол дистанциясының теміржолшылар тарапынан су жаңа заманауи күйге енгізіліп, жаңадан салынған болатын.  

– Теміржол өткеліндегі заманауи құрылғылар пойыздардың қозғалыс қауіпсіздігінің сақталуына қызмет ететін болады. Аталмыш жобаның құжаттамалық іс-қағаздарын дистанция инженері Нұрлан Аймахан әзірлеуге зор үлес қосса, оның іс жүзінде іске асырылуына тәжірибелі шебер Базархан Сақбаев жетекшілік етуде. Олардың үйлестіруімен құрылыс-монтаж жұмыстары белгіленген мерзімнен кешікпей, сапалы орындалуда. Бригада мүшелері теміржол автоматикасы мен телемеханика саласындағы заманауи талаптарды ұстанып, қауіпсіздік техникасын қатаң сақтап жұмыс жасады, – дейді инженер Нұрлан Жәнібеков.  

Жалпы, Бәйгеқұм станциясындағы теміржол өткеліне автоматтандырылған, заманауи үлгідегі шлагбаум орнату шарасы теміржол мен автомобиль жолының қиылысындағы қозғалысты ретке келтіріп, теміржол көлігі қозғалысының қауіпсіздігін қамтамасыз ететін маңызды қадам болмақ. Жоспарланған жұмыстар аяқталған соң, бұл өткел орталықтандырылған басқару жүйесіне қосылып, диспетчерлік бақылауға алынады. Сонымен қатар жол дистанциясы, локомотив бригадалары және автокөлік жүргізушілері арасындағы үйлесімді әрекет жолға қойылады.