ҚТЖ-да қағазсыз құжат айналымына қадам: QR-код тәжірибеге енгізілуде

ҚТЖ қағаз арқылы құжат айналымын азайтып, мүмкіндігінше электронды құжат айналымын бір ізге түсіргені белгілі. Осыған орай, уақыт талабымен үндесе отырып, жалынды жастардың бастамасымен озық технологияларды өндірісте қолдану кең өріс алып келеді.

Осы күндері Түркістан локомотив пайдалану депосында жылу техникаларының жетекші инженері болып еңбек ететін Санжар Шәкәрімов QR-кодты кеңінен қолданысқа енгізудің жай-жапсарын зерделеуде.  

– Қазір QR-код көп жерде қолданылады. Озық технологиялы үлгіні біз де өз саламызда кәдеге жаратсақ дейміз. Айталық, бізге телефонограмма немесе факсограмма арқылы біліктілік арттыру жиындарына шақырту хаттар келіп жатады. Енді соның бір бұрышына әлгі QR-кодты енгізуді ойластырудамыз. Өйткені оны енгізу аса қиын емес, есесіне ақпаратқа қол жеткізудің тиімділігі артады, – дейді ол.  

Зейіні зерек, жаңашылдыққа жаны құмар Санжардың сөзіне сүйенсек, бұл амалдың астары мынадай. Әлгі шақырту хаттың бұрышындағы QR-кодты телефонмен сканерлегенде, хаттың мазмұны мен мекен-жайынан бөлек өзге де қажетті ақпараттар телефон экрнанына шыға келеді. Ол ол ма, тіпті діттеген жердің картасы мен сол мекеменің жұмыс уақыты, оған жету жолдары мен жұмсалатын уақыт, қаржылық шығын, жалпы жету амалдарына қатысты жанжақты әрі толыққанды ақпараттар шығады. Расымен де, қазіргідей ақпараттық технология дамыған кезеңде мұндай жетістіктерді мейлінше еркін әрі тиімді пайдалану – құптарлық іс. Оның үстіне қолданушылар үшін уақыттан ұтып, тиімділігі мол әдіс, амал болса, оны неге қажетке жаратпасқа?!.  

– Сондықтан да біздің негізгі бағытымыз өндірістік сала болғанымен, тиімділігі мол технологиялық әдістерді еркін қолдануды қолға алып жатырмыз. Осы мақсатта жауапты мамандардың назарына өз ойымызды рационализаторлық ұсыныс ретінде жіберіп отырмыз, – дейді Санжар Дауренбекұлы.