Ақтөбе теміржолы цифрландырудың жаңа деңгейіне өтуде
Ақтөбе облысы бойынша меншікті тілші
Никельтау – Қандыағаш учаскесінде қозғалыс қауіпсіздігін арттыруға бағытталған ЦАБ-АЛСО жүйесі іске қосылмақ. Бұл жоба пойыздар қозғалысын тиімді ұйымдастырып қана қоймай, магистральдың өткізу қабілетін едәуір ұлғайтуға мүмкіндік береді.
Жаңа цифрлық кешен пойыздар қозғалысының қауіпсіздігін күшейтіп, автоматика құрылғыларының сенімділігін арттыруға және тасымалдау процесін басқарудың тиімділігін жақсартуға мүмкіндік береді. Никельтау станциясының басшысы Рустам Маратұлының айтуынша, жоба аясында станциядағы жұмыс орны толық жаңартылып, ескі сыртқы табло мен басқару пульті заманауи цифрлық жабдықпен алмастырылды. Соның нәтижесінде пойыздар қозғалысын бақылау жеңілдеп, жедел шешім қабылдау мүмкіндігі кеңейді.
– ЦАБ-АЛСО жүйесін енгізу – Ақтөбе өңіріндегі теміржол инфрақұрылымын жаңғыртудың маңызды кезеңдерінің бірі. Жоба іске асқан соң магистральдың өткізу мүмкіндігі артып, жүк және жолаушылар тасымалының тұрақтылығы мен қауіпсіздігі жаңа деңгейге көтеріледі, – деді станция басшысы.
Жобаның басты мақсаты – теміржол желісінің өткізу қабілетін арттыру. Қазіргі уақытта Қандыағаш – Никельтау бағытында тәулігіне 15 жұп пойыз қатынаса, жоба толық іске қосылғаннан кейін бұл көрсеткіш 25 жұпқа дейін өседі деп күтіледі. Ал Никельтау – Әйтеке би бағытында тәулігіне қатынайтын 7 жұп пойыз саны 25 жұпқа дейін ұлғаяды.
Бұл өзгерістер жүк тасымалы көлемін арттырып қана қоймай, өңірдің экспорттық және логистикалық әлеуетін күшейтуге ықпал ететіні сөзсіз. Сондай-ақ қозғалысты ұйымдастыру сапасы жақсарып, теміржолшылардың жұмыс тиімділігі артады.