Жаһанжеліге жаппай қолжетімділік
Абай облысы бойынша меншікті тілші
Бүгінгі таңда Семей ЖТ бөлімшесі бойынша цифр- ландыру, жаңа ақпараттық технологиялар игілігіне сүйену мәселелері алғашқы орында тұр. Президент Жолдауының басымдықтары аясынан туындайтын осы шаралар бойынша ағымдағы жылы да ілкімді жұмыстар жүргізілді.
Атап айтсақ, бөлімшеге қарасты Жаңа-Семей-Шар, Шар-Аягөз телімі аралығындағы бірқатар шағын станцияларда тұратын теміржолшылар отбасы биыл ғаламторға қосылу мүмкіндігіне ие болды. Аталмыш шараларды Транстелекомның Семей филиалы қызметкерлері шалғайдағы елді мекендерді «Кең жолақты қолжетімділікпен қамтамасыз ету» жобасы аясында іске асыруда. Ауқымды шара елімізге соңғы жылдары енгізілген жаңашылдық – талшықтыоптикалық байланыс желілерінің технологиясы бойынша іске асырылыпты.
Жалпы, аталмыш жоба халық саны 250 адамнан асатын, қалалардан неғұрлым шалғайда орналасқан елді мекендерді кең жолақты интернетпен қамтамасыз етуді көздейді.
Соның аясында бұрынғы Жарма жол дистанциясына қарасты аумақтағы 15 елді мекен жоғары жылдамдықты интернетпен қамтылды. Оның ішінде Семей транстелеком филиалы мектептер мен ауылдық амбулаториялардан тұратын 53 мекемені де мемлекеттік бағдарлама аясында ғаламторға қосыпты. Араларында Семей ЖТ бөлімшесімен жүк тиеу, түсіру бойынша әріптестік орнатқан бірқатар өндіріс орындары да бар. Нәтижесінде өңірдегі талшықты-оптикалық желілердің жалпы ұзындығы 138,850 шақырымнан асқан. Ендігі аралықта жергілікті теміржолшылар қауымы онлайн құжат рәсімдеу, электронды үкімет қызметіне сүйену, қашықтықтан дәріс алу сынды игіліктерді ғаламтордың көмегімен ала береді деген сөз. Әсіресе, мектеп пен ауруханалар қызметіне ғаламтор арқылы да жүгіне алатындықтарына риза. Бір бұл емес, жыл аяғына дейін тағы 200-ден аса абонентті жоғары жылдамдықты интернетке қосу жоспарланып отыр.
Ғаламтор игілігін айқын сезінген теміржолшылар кенті – Суықбұлақ станциясының сала қызметкерлері интернетке қосылумен бірге тіршілік барысы бұрынғыдан көп жеңілдегенін айтады. Жаңа оқу жылына дейін 350 абонент жаһанжеліге жалғаныпты.
Отбасы мүшелерінің білім ордалары, ауруханалармен байланысы да осылайша жаңаша жолға қойылған.
– Көзделген мақсат айқын, қазақстандықтардың цифрлық әл-ауқатын арттыру. Осы орайда аталмыш бағыттағы жұмыстарды алдағы жылы да жалғастыру жоспарланып отыр. Тағы да 13 елді мекен тұрғындарын интертнетке қосамыз, Интернетке жаппай қолжетімділік орнатамыз, – дейді бұл ретте «Семейтранстелеком» филиалының қызметкерлері.