Қызылордалық жолшылар бағыттамалы бұрмаларды ауыстыруға кіріскен
Қызылорда облысы бойынша меншікті тілші
Жол табанын сауықтыруда өткен жылы жоспарға сай жұмысты толық аяқтаған қызылордалық жолшылар үшін кезек бағыттамалы бұрмаларға келді. Жаңа жылға санаулы күн қалғанда Қызылорда станциясының солтүстік алқымындағы ағаш шпалды №4 бағыттамалық бұрманы ауыстыру жүзеге асты. Алдағы күндері, қаңтардың соңына қарай Сұлутөбе станциясында бұрма ауыстыру кезек күтіп тұр.
Қызылорда жол дистанциясының бастығы Марат Оңалов пен бас инженер Ақылбек Әбілдаев, техникалық бөлімнің жетекші инженері Ахметқали Елеусинов станция жолындағы негізгі бағыттамалы бұрманы ауыстыруға арнайы алынған толаскезде жұмысты тиімді ұйымдастырды. Жұмысқа дистанцияның жеке құрамынан 30 шақты жолшы мен МПТ-12 мен АС техникалары, Берік Әбжаппаров басқаратын Қызылорда қалпына келтіру пойызының ЕДК-300/2 көтергіш краны жұмылдырылды.
Қозғалыс қызметін басқарып отырған диспетчерлердің толаскезге рұқсат берген уақытынан бастап әр жолшының жасайтын жұмысы күнібұрын белгілі болғандықтан іске жұмыла кірісті. Бекітпе бұрандалары босатылған бұрманың рельстері көтергіш кранмен көтеріп алынып, орны тегістеліп тапталып, жер төсемі әзір болғанда жаңа Р-65 маркалы отандық рельстерге sslk бекітпесімен бекітілген бағыттамалық бұрма төселді.
Жалпы жол жөндеу, жолға күтім жұмысының түгелі өлшем мен технологиялық талапқа сай қатаң бақылауды қажет етеді. Бағыттамалы бұрманың ерекшелігі де өлшемге тіреледі. Себебі бұрмаға қарсы бағытта келе жатқан тепловоздың қажетті жолға бұрылу үшін пайдалану ережесіне сай бұрма үшкірінің рельске жанасатын ұшы мен рельс қаңқасының арасындағы аралық 2 мен 4 мм өлшемде болуы шарт. Осы өлшемнің сақталуы бұрманы ауыстыру кезінде де, өзге уақытта да қатаң талап етілетіндіктен, бір өлшемді бірнеше рет тексеріп бақылау қажет етіледі. Соған орай жолшылар да осы өлшемдерге аса мән беріп, технологияның қатаң сақталуын назарда ұстады. Сонымен қатар, Қызылорда магистральдық желі бөлімшесі директорының орынбасары Ербол Оңғарбаев толаскез жұмысын бақылауда ұстап, жолшылардың берілген уақытты ұтымды пайдалануын қадағалады.
Сабырхан СЕЙІЛБЕКҰЛЫ