Маңғыстауда биыл 72 шақырым жол жаңартылмақ
Маңғыстау облысы бойынша меншікті тілші
Былтыр Маңғыстау магистральдық желі бөлімшесіне қарасты аумақта 48,04 шақырым жолға күрделі жөндеу жүргізілген. Соңғы үлгідегі құрылыс-жөндеу жұмыстарының нәтижесінде қозғалыс қауіпсіздігі мен жылдамдыққа кері әсер ететін факторлар айтарлықтай азайған. Нәтижесінде жол сапасы жақсарып, түбек теміржолының өткізу жылдамдығы артқан.
Таратып айтсақ, Маңғыстау-Бейнеу учаскесіндегі күрделі жөндеу Бекет 12 мен Бекет 13 аралығына ұзындығы 17,46 км, Бекет 3-Үстірт станциясы аралығында 18,94 км, Бекет 7-Сай-Өтес станциясы бойынша 11,64 км жолға жасалған.
Сондай-ақ, рельстердің желінуіне байланысты Бейнеу жол дистанциясы бойынша Сай-Өтес-Бекет 9, Бейнеу станциясының жүк жөнелту жолдарында 2,466 км, Маңғыстау жол дистанциясы бойынша Бекет 9, Шетпе, Маңғыстау, Қарақия станциясының жүк жөнелту жолдарындағы 6,67 км ескі рельстер Р65 типті ауыр рельске ауыстырылған. Мұндай жұмыстар жылдың соңғы айларында да жалғасқан. Желтоқсан айында Ақжігіт, Бекет 5, Бекет 9, Шетпе, Манғыстау станцияларының бас жолдарында 9 дана ескі ағаш шпалды бағыттама бұрмасының орнына темірбетон шпалды бағыттама бұрмасы қойылған.
Атап өтерлігі, бөлімше аумағында өткен жылы қозғалыс қауіпсіздігін бұзу дерегі тіркелмеген. Өндірістік жарақат алу жағдайлары да болмаған. МДК жол өлшегіш вагонының тексеріс қорытындысы бойынша жол күтімі 41 бірлікке орындалған. Бұл жоспарға қарағанда орындалу көрсеткішінің 137 пайызға жеткенін айғақтайды.
Маманның айтуынша, түбек теміржолында малдан келген қауіп сейілмей тұр. Өткен жылы 97 мал пойызға басылған. Былтыр 125 шақырым жол бойына жаңадан малға қарсы қоршау тұрғызған. Тағы 25 шақырым қоршау жөндеуден өткізілген. Өткелдердегі қауіпсіздікке қатысты 3300 автокөлік жүргізушісіне теміржол өткелінен өту ережесі таныстырылған.