Биыл 567 шақырымнан астам жол жөнделмек

Өткен жылды табысты көрсеткіштермен тәмамдаған «Қазақстан темір жолы» ұлттық компаниясының алдында биыл қандай міндеттер тұр? Ең алдымен теміржол инфрақұрылымын дамыту мәселесі тұрғаны анық. Үстіміздегі жылы Компания бойынша 567,5 км жолды күрделі жөндеуден өткізу жоспарланған.

Магистральдық желі дирекциясы алға тартқан мәліметтерге сүйенсек, инфрақұрылым мәселелері бойынша 2021 жылы жолды жөндеу жұмыстарының жоспары 7% асыра орындалып, 1 031 км-ді құраған. Оның ішінде 582 км жол күрделі жөндеуден өткен. Биыл күрделі жөндеу бойынша бұл көрсеткіш өткен жылға қарағанда 14 км аз болып отыр.

Компания күрделі жөндеу жұмыстарын жүргізу барысында транзиттік учаскелерге басымдық беріп отырғанын айтар едік. Мәселен, былтыр жөндеуден өткен 309 км жол транзиттік телім еншісіне тиесілі және ол жолды күрделі жөндеудің жалпы көлемінің 53%-ын құраған. 2021 жыл еншісіндегі тағы бір жағымды жаңалық – бағыттағыш бұрмалардың 513 жиынтығы сатып алынып, ауыстырыла бастауы. Теміржол инфрақұрылымының аса маңызды бөлшегі болып табылатын бағыттағыш бұрмалар 2018 жылдан бері алынбаған екен. Демек, бес жүзден аса бұрмалар тозу деңгейін біршама төмендетпек.

Сонымен қатар, дирекция мамандары берген мәлімет бойынша былтыр жол машиналарының кешендерімен 6 мың км жолда сауықтыру жұмыстары жүргізіліп, нәтижесінде жолаушылар пойыздары үшін 774 километрде, жүк және контейнерлік пойыздар үшін сәй- кесінше 542 км және 1037 шақырымда жылдамдыққа қол жеткізілген.

Жол және құрылыстар департаментінің директоры Ербол Сәулебековтің айтуынша, күрделі жөндеу барысында пайдаланылатын жолдың жоғарғы құрылымы материалдарының бәрі – отандық өндіріс өнімдері. Теміржолдың негізін қалаушы темірбетон шпалдар «КазШпал» АҚ, «БЕНТ», «NORD Пром НС», «Магнетик» кәсіпорындарының шпал зауыттарынан шығарылса, балласт – жергілікті шағыл тас зауыттарының материалдары. Ал рельстер Ақтөбе рельс-арқалық зауытының өнімдері болып табылады. Тек металл бұйымдары – нығайтқыштар Ресейден сатып алынуда.