ҚТЖ көлік дәліздерінің транзиттік әлеуетін дамытуға жоспарлайды
«Қазақстан теміржолшысы» газетінің тілшісі
Дереккөздер соңғы 15 жылда еліміздің көлік саласына шамамен 35 млрд доллар көлемінде қаржы жұмсалғанын көрсетеді. Қазақстан темір жолы үшін, әсіресе, табыс көзі болып саналатын көлік дәліздерінің транзиттік әлеуетін дамыту аса маңызды, деп хабарлайды Rail-news.kz.
Бүгінде транзиттік дәліздердің кезең-кезеңмен жаңғыртылуы алғашқы нәтижелерін беріп те жатыр. Мәселен, өткен жылы транзиттік контейнерлік тасымалдар 1 миллионнан астам ЖФЭ-ні құрап, 2020 жылдың көрсеткішінен 22%-ға жоғары болғаны салаға жұмсалған инвестицияның ақталуы деген жөн. Бүгінде Қазақстан арқылы 11 халықаралық транзиттік дәліз өтсе, соның бесеуі темір жол көлігіне, автомобиль жолына тиесілі.
Осы ретте, 2021 жылы транзиттік тасымалдардың тұрақты өсуін назарға ала отырып, Қазақстанның 2025 жылға дейінгі ұлттық даму жоспарына сәйкес темір жолдарды дамыту негізінен транзиттік бағыттарда жүргізілгенін айтар едік. Әсіресе, өткізу қабілеті шектеліп отырған Достық-Мойынты транзиттік учаскесін дамыту басымдыққа ие.
«ҚТЖ» ҰК» АҚ-ның өндірістік процестер жөніндегі басқарушы директоры міндетін атқарушы Бауыржан Орынбасаровтың айтуынша, өткен жылы екінші жолдарды салуға қатысты жобалық шешімдер өзгертілген. Бұл жобалық шешімдердің іске асырылуы ҚР Үкіметі тарапынан қолдау тауып, «Қуатты өңірлер – ел дамуының драйвері» ұлттық жобасына енгізілген. Және де жобаның қаржылық-экономикалық негіздемесі әзірленіп, Достық станциясын дамытудың бас жоспары бекітілген. Техникалық-экономикалық негіздемесі әзірленіп, бүгінде жоба экологиялық және мемлекеттік сараптамадан өтуде. Демек, 2021 жылы жүргізілген ұйымдастыру-дайындық жұмыстары 2024 жылға дейінгі екінші жолдарды салу бойынша директивтік мерзімдерді орындауға мүмкіндік бермек.
Оның айтуынша, өткен жылы Қытайда Цзинхэ-Алашанькоу шекара учаскесінде электрлендірумен екінші жолдардың құрылысы басталған. Бұл – Достық-Мойынты жобасының дер кезінде іске асырылып жатқанының және қазақстан-қытай шекарасындағы теміржол инфрақұрылымының синхронды дамуының айқын дәлелі.
Сонымен қатар жеке өндірістік қуаттарды жұмылдыру есебінен Қызылорда бөлімшесінің 4 жекелеген пунктінде ұзынқұрамды пойыздарды өткізуді қамтамасыз ету үшін қабылдау-жөнелту жолдары ұзартылса, Алтынкөл станциясында екі жаңа жол салынған. Ал Теректі, Түйемойнақ, 3-разъезде бір жолдың құрылысы басталыпты. Жалпы ұзынқұрамды пойыздарды өткізуді қамтамасыз ету бағдарламасын 2024 жылға дейін жалғастыру жоспарлануда.