Қызылордада ағаш шпалға бекітілген 4 бұрма темірбетонға ауыстырылды
Қызылорда облысы бойынша меншікті тілші
Қызылорда магистральдық желі бөлімшесіне қарасты Қазалы жол дистанциясының жолшылары Бекбаулы, Шөміш, Еңбекшіқазақ және Қазалы станцияларында бағыттама бұрмалары жинағын ауыстырды, деп хабарлайды Rail-news.kz.
Қазалы қалпына келтіру пойызының көтергіш ЕДК-500 кранының көмегімен әр бекетте кезегімен алты сағаттық толаскез алынып, бұрынғы ағаш шпалға бекітілген бағыттама бұрмалары темірбетонға алмастырылды. Қызылорда магистральдық желі бөлімшесі жол бөлімінің инженері Аралбек Нұрмағанбетов толаскезге берілген уақыт тиімді пайдаланылып, жоспарлы жұмыстардың нәтижелі аяқталғанын жеткізді.
Айтуынша, бұған дейін Қызылтам бекетінде де бағыттама бұрманы жаңалаған қазалылық жолшылардың бұл жұмыста тәжірибелері жеткілікті. Жұмыс жоспарға сәйкес, жол күтімін жасаудың кешенді негізінде іске асырылған. Дистанцияға қарасты телім жолшылары барлық жұмыстардың технологиялық талаптарға сай жүргізілуін бақылауда ұстады.
– Толаскез кезінде телімдерден кесте бойынша өтетін пойыздардың кідірісіне жол берілген жоқ. Жолшылармен бірге қазалылық белгі берушілер мен байланысшылар, электрмен жабдықтаушылар және станция теміржолшылары да толаскезге қатысып, өздеріне тиесілі жұмыстарды сапалы атқаруға күш салды, – дейді жол бөлімінің инженері Аралбек Нұрмағанбетов.