Шағыр – Талдықұдық аралығындағы жол жөнделді
«Қазақстан теміржолшысы» газетінің тілшісі
«ҚТЖ» ҰК» АҚ Қозғалыс қауіпсіздігі жөніндегі директоры Марат Шакенов бастаған комиссия Шымкент жол бөлімшесінде көшпелі бақылау тексерісін жүргізді. Комиссия құрамындағы мамандар жол мен инфрақұрылымды көктемгі комиссиялық тексерудің сапасына баға берді.
Комиссия Шағыр–Талдықұдық аралығындағы жолдың, жер төсемінің, электрмен жабдықтау, автоматика, телемеханика және байланыс құрылғыларының жағдайын тексерді. Аталған учаскеде жарияланған 30 сағаттық «толаскез» кезінде бір жолға күрделі жөндеу жүргізілді. Бұл жұмыстар жолдың сапасына сенімділікті және оның беріктігін едәуір арттырды.
Күрделі жөндеу жүргізуге арнайы жол техникасы тартылды. Соның ішінде SMD-80 сериялы әмбебап машина да бар. Бұл техника жоғары өнімділігі және тиімділігімен ерекшеленеді. Машина құрылыс материалын конвейермен бере отырып, шпалдардың барлық түрлерін алып тастай алады және төсейді.
– Өңірдің барлық қызметтері бойынша теміржолшылардың өзара үйлесімді іс-қимылын және жұмыстың жақсы ұйымдастырылғанын ерекше атап өткім келеді. Күннің ыстықтығына қарамастан жол жөндеу жұмыстары кесте бойынша жүргізіліп жатыр, – деді Марат Шакенов.
Сондай-ақ, комиссия өңірдің локомотив депосы мен станцияларының жазғы кезеңде тұрақты жұмысқа дайындығын тексерді. Бұдан бөлек пойыздар қозғалысының қауіпсіздігін қамтамасыз ету жөніндегі іс-шаралардың орындалуын тексеруге ерекше назар аударылды.