Табиғаттың тосын мінезі Маңғыстаудағы ревизорлардың жұмысын күшейтті
Маңғыстау облысы бойынша меншікті тілші
Теміржол көлігінде тасымалды қамтамасыз етуші мекемелер үшін ең маңызды көрсеткіш – қозғалыс қауіпсіздігі. Жүк және жолаушы тасымалын жүзеге асыратын салада қауіпсіздіктің сақталмауына не кедергі? Өңірдегі қауіпсіздік ревизорларының жұмысына көз жүгіртсек...
Маңғыстау теміржолында бұл салада аймақтық бас ревизор мен бес салалық ревизор және бір жетекші инженер қызмет етеді. Түбек теміржолындағы қауіпсіздіктің сақталуы мен қамтамасыз етілуі осы мамандардың тікелей назарында. Соңғы кездері өңірде болып жатқан табиғи жағдайлардың салдарынан теміржолға төнетін қауіп көбейген. Теміржолды құм басудан бөлек, жақында жауған нөсер жауынның да зардабы болмай қалған жоқ, соңғы жылдағы қуаңшылық кесірінен төрт түлік малдың талғажау іздеп теміржолды жағалауы да қозғалыс қауіпсіздігіне кері әсерін тигізіп отыр. Жыл басынан мамыр айына дейінгі көрсеткіш бойынша жолға шыққан мал үшін машинистер 16 шұғыл тежеу беріп, 12 жағдайда мал басылған. Ал өткен жылы бес айда 67 рет мал басу оқиғасы тіркелген екен... Өткен жылғы жағдайдан соң ревизорлар бірқатар шұғыл шаралар қабылдап, оқыс тежеулердің саны жүзден асып кетуіне орай дабыл қаққан. Жергілікті әкімдіктермен, мекемелермен бірлесіп түрлі кезде- сулер өткізіп, халық арасында түсінік жұмыстарын күшейткен. Нәтижесінде биыл келеңсіз оқиғалар саны әлдеқайда азайған.
– Теміржолды құм басып қалу да аймақтағы басты проблеманың бірі. Ал кешегі мамыр айының басында жауған нөсер бұл мәселені тіпті ушықтырып жіберді. Жауын суынан белгі беру-байланыс жүйесінің жұмысы зақымданып, жолдардың жалған бос болмауы көбейіп кетті. Ол өз кезегінде жолаушылар тасымалы мен жүк тасымалы кестесінің бұзылуына, пойыздардың тоқтап қалуына әкеліп соқты, – дейді РБ-14 жетекші инженері Нұрсұлтан Аяпов.
Қауіпсіздік ревизорлары көктемгі және күзгі байқаулардан бөлек ай сайын өздеріне бекітілген телімдерге шығып, қауіпсіздіктің сақталуын қадағалайды. Мекемелерді аралап, қауіпсіздік жағдайын тексереді. Айына әр ревизор жобамен бірнеше нысанды қамтыған төрт-бес акт тіркейді. Теміржолшылдардың білімін тексеріп, осалдық танытқандарын қайта емтиханнан өткізеді. Тиісті тапсырмалар мен бағыт-бағдар береді. Маңғыстау бойынша Опорная станциясынан әрі қарай Шалқарға, бергі шеті Қарақалпақстанға дейін, бір жағы Ақтау, теңіз порттарына, енді бір ұшы Түркіменстанмен шекара Болашаққа дейінгі аумақты алатын телімде 15 мекемеге қатысты қозғалыс қауіпсіздігінің мүлтіксіз сақталуын бақылайтын ревизорлардың әрқайсысының бекітілген міндеті бар. Біреуі қозғалысты, екіншісі тепловоз шаруашылығын, үшіншісі жол шаруашылығын қадағалайды.