Ақтау көлік колледжінің студенттері республикалық байқауда алғы шептен көрінді
Маңғыстау облысы бойынша меншікті тілші
«WorldSkills Kazakhstan 2022» VII республикалық байқауда ҚазККА филиалы – Ақтау көлік колледжінің студенттері жеңімпаздар қатарынан көрінді.
– Шәкірттеріміз 6 құзыреттілік бойынша сынға түсті. Нәтижесінде 5 алтын, 4 күміс, 2 қола медаль еншіледі. 3 студентіміз «Үздік маман» атанды. Олардың атын атау біз үшін мақтаныш. «Жүктерді жеткізу» бағытында Әсем Зәкенова, Несібелі Тілеулиева, «Темір жол көлігіндегі тасымалдау процесін басқару» мамандығында оқитын Иса Аяған, Альбина Сабурова, Арсен Айдолла, «Темір жол құрылысын жөндеу» құзыреттілігі бойынша Ерлан Аманбаев, Елдос Жанғабылов, Азамат Төлепов суырыла шығып, жетістікке жетті. «Сигнал беру, орталықтандыру, блоктау және автоматика жабдықтарын жөндеу, қызмет көрсету» бағытында Айдын Айладыров, «Локомотивті басқару» құзыреттілігі бойынша Өркен Ағадин, Бағдат Есберген, «Жол қозғалысын ұйымдастыру» мамандығында білім алатын Асем Каримова, Дамир Омар, Бердәулет Нұрмағанбет үмітімізді ақтап, жүлдегер болды, – дейді колледж директорының тәрбие ісі жөніндегі орынбасары Роза Кезбаева.
Жеңімпаздарды облыстық білім басқармасының басшысы мен техникалық және кәсіптік білім беру ұйымдарының әлеуметтік серіктестері салтанатты түрде марапаттап, қаржылай сертификаттар табыстады. Кәсіби шеберлік чемпионатының өңірлік кезеңіне Маңғыстаудан ғана емес, Алматы, Ақтөбе, Шымкент қалаларынан да студенттер қатысты.