Төретам менДиірментөбе станциялары арасындағы телімдерде реле ауыстырылып жатыр
Қызылорда облысы бойынша меншікті тілші
Теміржол телімдеріндегі белгі беру және байланыс құрылғыларының технологиялық талапқа сай жұмыс жасап бабында болуы ең алдымен оның күтіміне байланысты.
Құрметті теміржолшы Ғани Ысқақов басқаратын Қазалы белгі беру және байланыс дистанциясының теміржолшылары құрылғыларға күнделікті күтім жасаумен қатар Төретам мен Диірментөбе станциялары арасындағы телімдерде реле ауыстыруда. Дистанция бастығының СОБ жөніндегі орынбасары Жанболат Досжановтың басшылығымен жоспарлы жұмыс Шалқар әдісімен жүргізіліп, он күн ішінде аяқтауды көздеп отыр. Релелік шкафтардағы монтаждау жұмысына 26 теміржолшы екі-екіден бөлініп жұмыс істеп жатыр. Қажетті құрал саймандар жеткілікті. Алғашқы тәжірибе нәтижесіз емес.
Жадырасын Бейімбет, Байқожа станциясының аға электромеханигі Серікбек Бураханов, Қазалы-Жосалы телімінің бастығы Жаслан Қартабаев, Арал теңізі станциясының электромеханиктері Арман Бүркітбаев пен Берік Нұров сынды тәжірибелі мамандар діттеген жұмыстың дер кезінде сапалы орындалуына атсалысуда, – дейді дистанция бастығының орынбасары Жанболат Досжанов. Шалқар тәсілі – бұл теміржол бойындағы қандай да бір шұғыл жұмыс немесе күрделі жөндеу кезінде екі жолдың бірінің жабылу қажеттігі туындағанда қолданылатын әдіс. Яғни екі жол бойында жұмыс жасаған байланыс құрылғыларын бір жолда жұмыс жасауға шектеп, автобұғат жасау. Байланыс құрылғысын автоблоктау шараларын телім басына бармай-ақ релелік шкафта бұғаттап шектеу арқылы, байланыс құрылғыларының әрекетін бір жолдың бойымен жұмыс жасауға реттеу арқылы телімнен өтетін пойыздарды кідіріссіз өткізу. Бұл әдісті алғаш рет шалқарлық шеберлер қолданғандықтан қазіргі таңда теміржолшылар арасында «шалқар тәсілі» деген атпен кең тараған.