Белкөлде бағыттамалық бұрмалар қалпына келтіріліп жатыр
Қызылорда облысы бойынша меншікті тілші
Белкөл станциясында бағыттамалық бұрмаларды австриялық «Унимат» жол машинасы технологиялық талапқа сай бабына келтіріп жатыр. Аймақтағы қауіпсіздік ревизорлары жұмыс үдерісін бақылауда ұстап отыр.
Қауіпсіздік ревизорларымен бірге жол шебері Рахат Әлжанов пен жол бригадирі Бақытжан Нармахановтар жасалған ескерту мен кемшіліктерді қалпына келтіруге күш салуда.
– Темірбетонды бағыттамалық бұрмалардың технологиялық талапқа сай бабын жасап, қалпына келтіру жұмыстары жасалуда. Оған Қырқыншы станциясындағы механикаландырылған жол машиналары мекемесінің бағыттамалық бұрмалардың түзулігі мен ауытқуын қалпына келтіретін ауыр жол машинасы «Унимат» қолданылуда. Бұл жұмыстар бекітілген жоспар бойынша жүріп жатыр. Әзірге анықталған кемшіліктер дистанция жолшылары тарапынан қалпына келтіріліп, жол машинасы бірнеше қайталап жұмыс жасауда, – дейді «ҚТЖ»ҰК» АҚ Жол диагностикалық орталығы Қызылорда филиалының жол шаруашылығы бойынша қауіпсіздік ревизоры Әмірхан Жүсіпбеков.
Жол бойындағы бағыттамалық бұрмалар жолшылар тарапынан жоспарға сай ағымдық күтімнен өткізіліп тұрады. Дегенмен, белгілі уақытта жол машинасының көмегімен оларды тексеріп, бабына келтіріп бақылаудан өткізіп отыру – қозғалыс қауіпсіздігін арттырумен қатар сенімділік кепілі.
– Заманауи арнайы техниканың көмегімен оның түзулігін, салмақ әсерінен соғылып ауытқуын дәл анықтап, бабына келтірудің маңызы зор. Жол машинасы- ның жұмысынан кейін жолдың, бағыттамалы бұрмалардың жұмысына сенімділік те, сапа да артады, – дейді дистанцияның жол шебері Рахат Әлжанов.