Отандық өнім - сапа кепілі
Қызылорда облысы бойынша меншікті тілші
Жыл сайын темір жолдардың тиісті бір бөлігін күрделі жөндеуден өткізіп, жаңартып отыру – пойыздар қозғалыс қауіпсіздігін арттырудың бірден бір кепілі. Жол жұмыстарына маманданған «Integra Construction KZ» компаниясы үшін жаздың әр күні қызу да қауырт еңбекке толы.
Қазақстан темір жолының сенімді серіктесіне айналған мердігер компанияның Батыс дирекциясы бүгінгі таңда Қызылорда бөлімшесінде жұмыс жасап жатыр. Олар күрделі жөндеуден өткізілуі тиіс 70,095 шақырым жолдың 46,177 километріне су жаңа Р-65 маркалы отандық рельс төсеп үлгерді.
«Integra Construction KZ» ЖШС Батыс дирекциясының бастығы Дәурен Сұлтамұратов жөндеу жұмыстарына қатысты ақпармен бөлісті.
– Аймақ бойынша биылғы жылға жоспарланған күрделі жөндеу жұмыстары отандық өніммен сапалы жүргізіліп жатыр. Көктем шыға Сауран-Талап-Бесарық станциялары аралығында 25,656 шақырымға рельс тізбектері төселген болатын. Одан кейін мамыр айының соңында Қызылорда-Қараөзек теліміндегі 20,521 шақырымдық жолды жаңартуды бастағанбыз. Бүгінде рельс тізбектері толық төселіп, ендігі кезекте жолды технологиялық талапқа сай келтіру жұмыстары жасалуда. Күрделі жөндеу жұмыстарының жүргізілуіне тосын кедергілер туындаған жоқ. Техникамыз бен жеке құрам қашанда жұмысқа дайын. Толаскездер тиімді пайдаланылып, межеленген жұмыстар атқарылуда, – деді дирекция бастығы.
Жаңартылған жол төсемін, су жаңа рельстер астына салынған қиыршық тастарды дұрыс нығыздап, бекітуді, жалпы жолдың қажетті қалыңдықта және түзу салынуын Қызылорда магистральдық желі бөлімшесі мен Жол дистанциясының мамандары жіті тексеріп, бақылаудан өткізіп отыр.