Биыл Маңғыстау – Бейнеу учаскесінде 72,6 км жолға күрделі жөндеу жоспарланған

Соңғы кезде жол шаруашылығын жаңғыртуда жетістіктер жоқ емес. Түйіспелі рельстер түйіспесіз рельстерге, ағаш шпалдар темірбетонды шпалдарға ауыстырылып, жыл өткен сайын жолдар жаңарып келеді. Түбек темір жолын сауықтыру бойынша биылғы жылы ауқымды жұмыстар атқарылды.

Маңғыстау магистральдық желі бөлімшесіне қарасты жолдарға 25 метрлік рельстердің орнына жаңадан ұзын түйіспесіз рельстер салынды. Атап айтсақ, Бейнеу – Тассай телімінде Бейнеу – Парк Б – Алтай – Теректі – Сам аралықтарындағы 38,466 шақырым жолға осындай ұзын түйіспесіз рельстер төселді. Түйіспесіз жолдың буынды жолға қарағанда ерекшелігі – түйіспелерге жұмсалған бекітпелер үнем және қоршаған ортаға шығатын шуды азайтып, жылжымалы құрамның жүріс жайлылығын қамтамасыз етеді, сондай-ақ жолдың тозу деңгейін де азайтады. Темірбетонды шпалдардың қызмет көрсету мерзімі ағаш шпалға қарағанда 3-4 есе жоғары деседі мамандар.  

Жұмыс әлі жүріп жатыр, ол жыл соңына дейін жалғаспақ. Осы желтоқсан айында Бейнеу, Үстірт, Сай-Өтес, Шетпе, Манғыстау, Қарақия станцияларының бас жолдары мен станциялық жолдарында жатқан 8 дана ескі ағаш шпалды бағыттама бұрмасын су жаңа темірбетон шпалды бағыттама бұрмасына ауыстыру межеленіп отыр. Жыл басынан бері осындай жұмыстар Сай-Өтес, № 7, 9 бекеттерде жүзеге асырылып, 4 дана бағыттама бұрмасы жаңартылған еді.  

– Биылғы жыл Маңғыстау – Бейнеу учаскесінде 72,6 шақырымға күрделі жөндеу жоспарланған. Бекет 14 – Бекет 15 аралығында 21,89 шақырым, Бекет 3 – Үстірт – Бекет 5 аралығына – 28,65 шақырым, Бекет 16 – Тамақ – Маңғыстау станциясы аралығына 22,06 шақырым. Өткен он бір ай ішінде екі перегондағы жұмыстар толығымен аяқталды. Қазірде үшінші учаскедегі Бекет 16 – Тамақ – Маңғыстау аралығына 30 жұп түйіспесіз жолдың 24 жұбы төселіп болды. Ал бөлімше бойынша жалпы көрсеткіштерге келсек, өткен 11 айда қозғалыс қауіпсіздігін бұзу дерегі тіркелмеді. МДК жол өлшегіш вагонының тексеріс қорытындысы да көңілден шығады. Жол күтімі 41 бірлікке орындалып, 137 пайызды құрады. Жоспар 65 бірлік болатын. Сонымен қатар, 160 шақырым жерге малға қарсы жаңадан қоршау салынып, 20 шақырым қоршау жөндеуден өткізілген. Тек қолайсыздық туғызып тұрған бір нәрсе – ауа райынан, яғни шаңды дауылдан темір жол үстін құм-топырақ басып қалуы орын алғанда пойыздар қозғалысына қауіп төндіреді. Құм басқан жерлерді тазалауға жұмысшылар, қажетті техникалар жұмылдырылып, қыруар ресурс жұмсалуда, – дейді Маңғыстау магистральдық желі бөлімшесі жол бөлімінің басшысы Марлен Көктеубаев.