Құрық портында «Саржа» теңіз терминалы салынады

Каспий теңізінің шығыс жағалауында орналасқан табиғи шығанақ Құрық портында ауа-райы қолайлы болғандықтан жыл он екі ай тоқтаусыз автокөлік пен теміржол паромы жұмыс істейді.

«Құрық порты» ЖШС бас директоры Серік Ахметовтің айтуынша, портты дамыту мақсатында болашақта «SEMURG INVEST» ЖШС-мен арада келісімге қол қою жоспарлануда. Сол арқылы бекітілген жол картасына сәйкес порт нысандарының құрылысын аяқтау мерзімі бойынша өзара міндеттемелер айқындалатын болады. Портты одан әрі дамыту үшін судың түбін тереңдету жұмыстары жүргізілмек.

– Габаритсіз және ауыр салмақтағы жүктерді қабылдау, сонымен қатар порт арқылы басты жүктерді ауыстырып тиеу жұмыстарын жүргізу үшін су түбін тереңдете отырып, №3 айлақтың құрылысы бойынша әлеуетті инвесторлармен келіссөздер жүргізілуде. Мемлекеттік органдармен, сондай-ақ мүдделі ұйымдармен бірлесе отырып порттың қазіргі инфрақұрылымы төрт паромға бір уақытта қызмет көрсететін теміржол және автомобиль айлақтарымен бөлінген. 2022 жылдың нәтижесіне келсек, биыл 11 айда портта жүктерді ауыстырып тиеу көлемі 1697,7 мың тоннаны құрады. Дөңгелек техникасын түсіріп-тиеу көлемі 565,5 мың тонна болды, яғни 26 763 дана. Бұл 2021 жылдың сәйкес кезеңімен салыстырғанда 58 %-ке артық. Алдағы жылдары порттың өткізу қабілетін 1,5-2 миллион тонна жүкке жеткізуді жоспарлап отырмыз, – дейді С.Ахметов.  

2022 жылғы 15 қарашадағы республикалық бюджет комиссиясы отырысының нәтижесінде «Құрық порты» ЖШС-ін «Ақтау теңіз порты» АЭА қатысушылары құрамына енгізу туралы шешім қабылданды. Портты АЭА қатысушысы ретінде биыл жылдың соңына дейін тіркеу жоспарлануда. Басшылық қуаттылығы жылына 1 млн тонна астық жинауға мүмкіндік беретін астық терминалының құрылысын жүргізу бойынша Жаңаесіл астық компаниясымен уағдаластыққа қол жеткізді. Аталған терминалды келесі жылы пайдалануға беру көзделіп отыр.  

ҚР ИИДМ Көлік комитеті төрағасының орынбасары Қасым Тілеповтің айтуынша, Қазақстанның порт инфрақұрылымын дамыту үшін Құрық портында 2025 жылға қарай «Саржа» теңіз терминалының құрылысы жүргізілмек. Жоба аясында көлік-логистикалық орталық пен астық және сұйық жүктер терминалы салынады.