Қытайдан Еуропаға жүк ағыны екі есе өседі, біз бұған дайын болуымыз керек – Әлихан Смайылов
ҚР Премьер-Министрі Әлихан Смайылов Жетісу облысына жасаған жұмыс сапары барысында жүк тасымалының өсуі, Қазақстанның транзиттік әлеуеті туралы айтты, деп хабарлайды Rail-news.kz.
Жетісу облысына барған Әлихан Смайылов өңірдің көлік-логистикалық және агроөнеркәсіптік әлеуетін дамыту барысымен танысты.
Талдықорған әуежайында Үкімет басшысына өңірде салынып жатқан автожолдар, Үшарал қаласындағы әуежайдың ұшу-қону жолағын қайта жаңарту, сондай-ақ облыстың Алакөл ауданында транзиттік инфрақұрылымды дамыту туралы баяндама ұсынылды.
Жиын барысында Әлихан Смайылов қабылданып жатқан шаралар мен қалыптасып отырған сыртқы экономикалық ахуалдың нәтижесінде Қазақстан Азия мен Еуропа арасындағы маңызды құрлық дәлізіне және әлемдік маңызы бар көлік-транзиттік тораптардың біріне айналатынын атап өтті.
«Облыста транзиттік әлеуетті дамыту үшін барлық ресурстар бар. Оның аумағында “Достық” және “Нұр жолы” екі халықаралық өткізу пункті, “Достық” және “Алтынкөл” шекаралық теміржол стансалары орналасқан, халықаралық транзиттік маршруттар өтеді. Өңірдің барлық мүмкіндіктерін көлік-логистикалық салаға тарту қажет», — деді Премьер-Министр.
Үкімет басшысы бұл бағытта Достық – Мойынты темір жол учаскесінде екінші жолдардың құрылысы уақтылы басталғанын атап өтті, өйткені Қытайдың шектеулерді алып тастауы аясында Еуропаға жүк тасымалдау қарқынды өсуде.
«Қытай пандемия кезіндегі шектеулерді алып тастады. Соған сәйкес Еуропаға жөнелтілетін жүк ағыны екі есеге өсіп отыр, біз бұған дайын болуымыз керек. Қытай тарапы қазір соңғы шектеулерді алып жатыр, сондықтан контейнерлі жүк ағыны пандемияға дейінгі кезеңдегідей екі есе өседі. Сол себепті біз Президенттің тапсырмасымен Достық – Мойынты темір жол учаскесінде екінші жолдардың құрылысын бастадық», — деді Әлихан Смайылов.
Айта кетсек, 2022 жылдың қарашасында Достық – Мойынты теміржол учаскесінде екінші жолдың құрылысы басталған болатын. Ұзындығы 836 км жаңа теміржол желісін іске қосу отандық өнімнің экспортын ұлғайтуға және елдің транзиттік әлеуетінің өсуіне ықпал етпек. Құрылыс барысында 419 құрылыс нысаны, атап айтқанда 5 ірі көпір, 87 шағын және орта масштабтағы көпір, 288 су жүргізу құбыры, 14 автожол өткелі салынады, сондай-ақ энергетика және байланыс объектілерін салу жоспарланып отыр. Құрылыс 2025 жылдың 4-тоқсанында аяқталуы тиіс.
Премьер-Министр сонымен қатар Үшарал қаласындағы әуежайдың ұшу-қону жолағын қайта жаңартуды аяқтаудың маңыздылығын атап өтті, соның арқасында үлкен фюзеляжы бар әуе кемелерін қабылдау мүмкіндігі пайда болды. Оның айтуынша, жүргізіліп жатқан автожолдарды жаңғырту және қосымша пойыздарды іске қосумен бірге, бұл Алакөл және Балқаш көлдерінің туристік аймақтарын дамытуға айтарлықтай әсер етеді.
Әлихан Смайылов жалпы көлік саласында заманауи инфрақұрылымды құру үшін Үкімет ірі халықаралық серіктестерді тартатынын айтты. Атап айтқанда, «Достық» станциясында көпфункционалды жүк тасымалдау терминалы салынды. Жалпы жүк айналымы жылына 1 млн тоннадан астам, инвестиция сомасы 3 млрд теңгені құрайтын қойма қуатын енгізу жоспарланған. Сондай-ақ 500-1000 бірлікке арналған еурофур жеке паркін қалыптастыру жоспарлануда. Бастапқы кезеңде мұнда инвестициялардың жалпы көлемі 5 млрд теңгеден асады.