Биыл ҚТЖ желісінде 930 км жол жөнделмек

Көктемнің алғашқы күнімен «ҚТЖ» ҰК» АҚ-да теміржол желілеріне жөндеу жұмыстары жүргізіле бастады. 1 наурызда алғашқы «толаскез» жарияланды.

Биылғы алғашқы «толаскез» Жамбыл магистральдық желі бөлімшесінің Қаратау-Жаңатас теліміндегі жолға орташа күшейтілген жол жөндеу үшін 12 сағатқа ұйымдастырылды.  

– Жамбыл жол дистанциясының 5-теліміндегі 20 км жолға орташа күшейтілген жөндеу жұмыстары бүгін басталды. 1 наурызда 1 км жол жөнделеді. Соған «толаскез» алдық. Мердігер мекеме – «Ағадыр ПЧМ» кәсіпорны. Жоспардағы жөндеу жұмыстарын сәуірде аяқтау көзделіп отыр. Бұл аралықтағы темір жолдар өте ескі. Сондықтан жөндеу барысында ескі ағаш шпалдар темірбетон түріне ауыстырылады және рельстері мен жер төсемдері де жаңартылады, – дейді аталған дистанцияның 5-телім бастығы Мейірбек Егембердиев.  

Соған қоса бұған дейін Шымкент магистральдық желі бөлімшесіне қарасты жолдың ластанған төсемін терең тазалау бойынша жұмыстар басталған еді. Бұл жұмыстар австриялық машиналар кешенін қолдану арқылы жүргізілуде. Өткен жылы аталған техника толықтай жаңғыртудан өткізілді.  

Биыл «ҚТЖ» ҰК» АҚ желісінде 930 км жол жөнделмек, соның 56,7 км күрделі жөндеуден өткізіледі. Сонымен қатар 90,5 км жолға күшейтілген орташа жөндеу жүргізіліп, 109,95 км жолдың рельс тірегі тұтастай ауыстырылады. Бұған қоса 634 жиынтық бағыттама бұрмасы жаңа темірбетон бунақты түріне жаңартылады. Осылайша еліміздің теміржолындағы инфрақұрылымды жоспарға сай жаңарту арқылы теміржол тасымалының қауіпсіздігі нығайтыла береді.