Белкөл станциясында жаяу жүргіншілер көпірі пайдалануға берілді
Қызылорда облысы бойынша меншікті тілші
Биыл теміржол саласының инфрақұрылымын дамытатын қомақты жобалар іске асырылуда. Соның бірі – Қызылорда темір жолының Белкөл станциясында салынған жаяу жүргіншілерге арналған аспалы көпір құрылысы аяқталып, пайдалануға берілді.
Көпірдің ашылу салтанатына Қызылорда қаласының әкімі бастаған билік өкілдері мен теміржолшылар қатысып, көпшіліктің қуанышын бөлісті.
– Бұл көпір халықтың көп жылдан бергі сұранысы бойынша салынып отыр. Құрылысы 2021 жылы басталды. Құрылыс жұмыстарын сапалы әрі мерзімінде жүргізгені үшін мердігер мекеме «Голден сити» жауапкершілігі шектеулі серіктестігіне үлкен алғысымызды білдіреміз. Ұлт даналығында «құдық қазған, көпір салған және ағаш еккен» сауапқа кенеледі деген тәмсіл бар. Бүгінде біз сол сауаптың ең күрделісі мен маңыздысын орындадық. Мұны адам тағдырына жауаптылық, қолайлы мүмкіндік жасау жолы деп есептеймін. Жаңа көпір жергілікті тұрғындардың теміржолдан өту қауіпсіздігін қамтамасыз етуге қызмет етеді деп сенеміз, – деді қала әкімі Асылбек Шәменов.
Белкөл бекеті – Қызылорданың іргесіндегі үлкен станция. Темір жолдың қос қапталында орналасқан халық саны да жылдан-жылға көбейіп, қалаға қосылып кеткен деуге болады. Сондықтан соңғы кезде жаяу жүргіншілер үшін темір жолдан өту, қауіпсіздік мәселесі айтарлықтай қиындаған. Станциядағы 15-16 жолдың үстінен тартылған ұзындығы 100 метрдей болатын темір конструкциялы көпір құрылысы жергілікті әкімдіктің тапсырысымен 2021 жылы басталып, сапалы да берік отандық материалдардан салынған.
– Бұған дейін бекетке тоқтаған жүк пойыздарының арасынан жаяу жүргіншілер кедергісіз өтуі үшін вагондардың арасын бір-бірінен ажыратып қоятынбыз. Жаяу жүргіншілер өткелінің тұсына келген вагонды құрамнан ажыратып қосымша жұмыс жасайтынбыз. Ал маневрлік жұмыстар кезінде жолға адамдар шығып кетпеуін қадағалап алаңдаушы едік. Енді тұрғындар қауіпсіздік ережесін сақтап, тек көпірден өтетін болады деп үміттенеміз, бұл біздің жұмысымызды әлдеқайда жеңілдеткен болар еді, – дейді Белкөл станциясының бастығы Кенжебек Өтегенов.