Тереңөзек станциясында бағыттамалық бұрма ауыстырылды

Қызылорда магистральдық желі бөлімшесіне қарасты Қызылорда жол дистанциясының жолшылары Тереңөзек станциясының оңтүстік алқымындағы нөмірі бірінші бағыттамалық бұрманы ауыстырды.Таңертеңгі сағат онда басталған жұмыс алты сағаттық толаскезді түгел қамтып, сәтті аяқталды.

Бағыттама бұрмасын ауыстыру жұмысына Марат Оңалов басқаратын Қызылорда жол дистанциясы жолшыларынан бөлек Қызылорда қалпына келтіру пойызының еңбеккерлері ауыр техникаларымен, Қызылорда белгі беру және байланыс дистанциясының және Тереңөзек станциясының теміржолшылары жұмылдырылды. Толаскез басталысымен ЕДК-300/2 көтергіш кранының көмегімен ауыстырылатын бұрманы алып, орнына жаңасын салу жұмысы мамандардың қатаң бақылауымен жүргізіле бастады. Бұл жерде бағыттамалық бұрманың салынуында шеберлік пен өзіндік тәсіл бар, себебі ауыстырып келе жатқанда бөлік рельстерінің кемдеу немесе артық қалып, дәл орнына келмей қалуы әбден мүмкін. Мұндай кем-кетікті тез арада орнына келтіретін тәжірибелі жолшылардың көне әдістері маңызды саналады. Әдіс болғанда олар сырттан, тосын ешнәрсе алып келмей-ақ технологиялық талапқа сай қимыл жасап, рельстердің ретін келтіріп жібереді. Бұл жерде талай жылғы тәжірибе үлкен рөл атқаратын болуы керек.  

Бағыттамалық бұрманы ауыстыру жұмысын нәтижелі әрі уақытында өткізу үшін толаскезге берілген уақыттың әр сағаты мен минуты күнібұрын жоспарланған. Жол жөндеушілердің әрбір тобы өздеріне бөлінген жұмысты жылдам әрі сапалы атқаруға тырысуда. Жол дистанциясы бастығының орынбасары міндетін атқарушы Мұрат Байділдаев пен дистанцияның техникалық бөлімінің жетекші инженері Ахметқали Елеусінов барлық жұмысқа басшылық жасап жүр.  

Толаскез кезінде тәжірибелі теміржолшылардың атқарар жұмысы жауапты әрі маңызды саналады. Олардың төрт бөліктен тұратын бағыттамалық бұрмалардың ретімен алынып салынуын бақылап, бұрма рельстерінің есеппен біріне-бірінің жалғау сәтіндегі шеберлігіне көп нәрсе байланысты. Телім басшысы Абзал Айтжанов, телім басшысының орынбасары Дастан Зәмірбекұлы, жол шебері Сейтқасым Жұмаділов жұмысты ұйымдастырып әрі басқарып жүрсе, Алмат Бекішов, Мақсат Сексенбаев, Дәулеткерей Ибрагим, Қалдыбек Досмамбетов, Арслан Сүйеубай және Жеңіс Жаналиев сынды жол жөндеушілер нәтижелі жұмыс үлгісін көрсетуде.  

– Бұған дейін де бұрмалар ауыстырылып келгенімен әрбір толаскезге арнайы дайындық жасалып, бірінші рет өткізіп жатқандай ыждаһатпен іске кірісеміз. Әріптестерімнің әрқайсысы өздеріне бекітілген жұмысты жақсы біледі. Сондықтан сапалы жұмысқа кепілдік береміз, – дейді дистанцияның техникалық бөлімінің жетекші инженері Ахметқали Елеусінов.  

Станциялық жолдардағы бағыттамалық бұрманы ауыстырудың жауапкершілігі айрықша. Себебі бекеттен кесте бойынша өткізілетін пойыздарды қаңтарып қоймай, алдын ала келісілген кесте бойынша қосымша жолдарда қабылдап жөнелтіп жатады. Бұл жолы да Тереңөзек станциясы бастығының тікелей қадағалауымен кезекшілердің сауатты іс-әрекеті нәтижесінде қозғалыс қауіпсіздігі бұзылмай, құрамдар кестеге сай келіп-кетіп жатты.