Жол машиналары көмекке келді (Фото)
Қызылорда облысы бойынша меншікті тілші
Жол дистанцияларына көмекке келген ауыр жол машиналары темір жолдарды технологиялық талапқа сәйкестендіру жұмыстарын жүргізуде.
Қырқыншы машиналандырылған жол дистанциясы (Пчм-40) бүгінгі таңда Қызылорда телімінде жұмыс істеуде. Жолдардың түзулігі мен ауытқуын қалпына келтіру, қисайған жерлерін түзулеу, түскен жерін көтеріп, астын қиыршық таспен нығыздау, т.б. жол жұмыстары күннің аптап ыстығына қарамастан қарқынды жүріп жатыр. Қазіргі уақытта Қоскөл-Сексеуіл жаңа телімінде ДУОМАТ, ДГС, ПБР жол машиналарымен 16,8 шақырым жолдың бабын жасау жұмыстары атқарылуда. Бұдан кейін ауыр техникалар бөлімшенің Сексеуіл – Шалқар станциялары аумағында жалғасады.
– Мамыр айынан бері Қызылорда магистральдық желі бөлімшесінде Бесарық – Сауран, Шорнақ – Түркістан және Жалағаш – Тереңөзек станциялары аралықтарында РМ-80, РМ-2002, ДУОМАТ, ПБР, ДГС секілді ауыр жол машиналарымен аймақ жолдарының технологиялық талапқа сәйкес болуы үшін кешенді жұмыстар атқарылуда. Жол машиналарының жұмысы технологиялық талаптарға сай, кемшіліксіз болуы дистанцияның арнайы мамандары тарапынан бақыланып, қадағалануда, – деді жол бөлімінің жетекші инженері Мейіржан Жүнісов.
