Аптап ыстыққа қарамастан жол жөндеу жұмыстары жалғасуда

Қызылорда магистральдық желі бөлімшесі бойынша жазғы жол жөндеу жұмыстары қызған шақ. Бесарық – Сауран, Шорнақ – Түркістан және Жалағаш – Тереңөзек станциялары аралығында басталған жолды сауықтыру жұмыстары технологиялық талаптарға сай жүріп жатыр.

Қызылорда магистральдық желі бөлімшесі жол бөлімінің жетекші инженері Мейіржан Жүнісов жолдың бабын жасауға ауыр жол машиналары жегіліп жатқанын білдірді. Ербол Рүстемов басқаратын Қырқыншы машиналандырылған жол дистанциясының РМ-80, РМ-2002, ДУОМАТ, ПБР және ДГС типті жол машиналары жол төсемдеріндегі ластанған балласты тазалап қайта салу, қажет учаскелерде жолды көтеріп ұру жұмыстарын жүргізуде.  

Дәл қазіргі уақытта ауа температурасы +40 градустан жоғары болып тұр. Аптап ыстыққа қарамастан жол жөндеу жұмыстары таңалакеуімнен басталып, аса ыстықта тоқтатып, бесін ауа кешкі уақыттағы салқынды пайдаланып қайта жалғастырып жүріп жатыр. Қауіпсіздік мәселесіне басты назар аударылып, жолшылардың қорғаныш заттарын пайдалануы қадағалануда екен.  

Бөлімше бойынша күрделі жөндеуден өткен учаскелердің талапқа сай бабына келтірілу сапасын бөлімшенің жол бөлімінің мамандары мен Қызылорда жол дистанциясының күрделі жол жөндеу жұмыстарын қабылдаушы Қайыржан Төлегенов бақылап, сараптамадан өткізуде.  

Жолдардың технологиялық талапқа сәйкес бабын жасау арқылы қауіпсіздік қамтамасыз етілмек. Сондықтан жол техникаларының жұмысынан кейін телім бойын қызылордалық жолшылар қайта тексеріп, сенімділігін нығайта түсуде. Магистральдық желі бөлімшесі жол бөлімінің жетекші инженері Мейіржан Жүнісовтің айтуынша, бір айға созылған Бесарық – Сауран, Шорнақ – Түркістан және Жалағаш – Тереңөзек станциялары аралықтарындағы жұмыс бүгінде аяқталуға жақын. Алдағы уақытта ауыр машиналар жұмысын Сексеуіл-Шалқар аралығында жалғастырады.