Жол жөндеу жұмыстары жаз бойы жалғасады

Қызылорда магистральдық желі бөлімшесіне қарасты мекемелерде пойыздардың қозғалыс қаупсіздігін арттыру мақсатында жазғы жол күтімі жұмыстары қарқынды жүріп жатыр.  

Дистанцияның техникалық бөлімінің жетекші инженері Ахметқали Елеусіновтің мәлімдеуінше, жыл басынан бері олар Қызылорда – Белкөл, 20-бекет – Шиелі және Қызылорда – Қараөзек станциялары аралығында 12,3 шақырымның  рельс тіреулерін ауыстырған. Үш шақырымда түйіспесіз рельстер алмастырылған.

– Жол табанын сауықтыру жұмыстары – пойыздардың қозғалыс қауіпсіздігін арттырудың бірден бір кепілі. Қызылорда магистральдық желі бөлімшесі мен дистанция басшылығының кешенді шаралары жаз бойы жалғасады. Мамыр айында Бәйгеқұм – 20-бекет, Шиелі – Ақмая станциялары арасындағы 0,4 шақырымның ескі рельстері жаңаланған. Талап, Тереңөзек, Шорнақ, Жаңақорған станцияларындағы 7 жиынтық бағыттамалық бұрма темірбетон белдеулерімен бірге ауыстырылды. Және де осындай жұмыстар алдағы айларда Тереңөзек – Қараөзек, Белкөл – Бірқазан, Шиелі, Қаракеткен – Қараиірім станциялары аралығында қарқынды жүргізу жоспарлануда, – деді техникалық бөлімнің жетекші инженері Ахметқали Елеусінов.

Жолшылар күнделікті жолдың бабын жасауға қолда бар құрал-саймандарды қолданады. Дегенмен жол күтімін жасауға қажетті көтергіш домкрат, бұранда бұрайтын құрылғылар секілді шағын механизация тапшылығы байқалады, олар әр жол жөндеушінің қолында жеткілікті болса, жұмыс та өнімді бола түсер еді дейді дистанция өкілі.  

Жаз маусымы басталғалы теміржол өткелдерінде автокөлік, жаяу жүргіншілер қозғалысы көбейіп, пойыздардың қозғалыс қауіпсіздігіне төнген қауіп те арта түскен. Жалпы дистанцияның балансындағы 15 теміржол өткелінің 8-і күзетіледі. Жыл басынан бері өткелдерде апатты оқиға тіркелмеген. Оған дистанция басшылығы тарапынан ұйымдастырылып отырған кешенді шараларда сеп болса керек. Мәселен, әр айдың 10-ы мен 25-і күні жергілікті атқарушы орган, МАИ қызметкерлерімен бірігіп автокөлік жүргізушілеріне түсіндірме жұмыстары жүргізіліп, жергілікті ақпарат құралдарында, әлеуметтік желіде темір жолдың қауіп-қатерін түсіндіретін роликтер таратылады. Нәтижесінде бес айдың ішінде желілерге 7 бейнекөрініс таратылып, 128 рет рейд ұйымдастырылған. 3865 автокөлік жүргізушісі өткелден өту ережесімен таныстырылған. Тұрғындармен 130 мәрте жиналыс өткізіліп, 4991 адамға ережелер қайталап таныстырылған.

Дегенмен, қауіп азаяр емес. Мысалы, бес ай ішінде тепловоз машинистері 40 рет жедел тежегіш басуға мәжбүр болса, тек мамыр айында осындай жағдай 10 мәрте қайталаныпты, 5 рет малдың, 5 мәрте адамның жолға шығуы орын алып, мал басылған бір оқиға тіркелген.