Жүз ғимарат жөндеуден өтеді
«Қазақстан теміржолшысы» газетінің тілшісі
«ҚТЖ» ҰК» АҚ Магистральдық желі дирекциясы Өндірістік ғимараттарға жөндеу жүргізу бағдарламасын бекіткен. Аталған бағдарлама аясында 2026 жылға дейін 1431 объектіге ағымдағы жөндеу және 191 объектіге күрделі жөндеу жүргізіп, жаңарту жоспарланған.
Үстіміздегі жылдың бірінші жартыжылдығында Магистральдық желі дирекциясы 100-ден астам өндірістік ғимаратты жөндеуді жоспарлаған болатын. Қазіргі таңда өндірістік ғимарат пен үй-жайларды жөндеу жұмыстары басталды. Бүгінгі таңда магистральдық желінің Қостанай, Шымкент және Маңғыстау бөлімшелеріндегі 14 нысанда өндірістік процестер аяқталды. Ал Апановка станциясындағы тартымдық қосалқы станциясы мен байланыс желісі ауданының ғимараты, Игілік, Шойтөбе, Дарбаза және басқа да объектілердегі табельдер жөнделген. Сонымен қатар 50-ге жуық нысанды жаңарту бойынша жұмыстар аяқталуға жақын. Жөндеу жұмыстарын жүргізу кезінде объектілердің қысқы кезеңде жұмысқа дайындығына ерекше назар аударылып отыр.
Ал Компанияның еншілес ұйымы «Кедентранссервис» АҚ болса, өз қызметкерлеріне модульдік санитарлық-тұрмыстық үйлер сатып алуда. Осындай үйлердің алғашқысы аталған компанияның Қарағанды филиалына орнатылды. Ол кран машинистері мен қабылдап-тапсырушыларға арналған. Модульді үй сантехникамен, кондиционер, су жылыту, қуат көзі, өрт белгісі, жылыту жүйелерімен жабдықталған. Тіпті, үйде, асүй аймағы жабдықталып, жиһаздар қойылған. Өндірістік персоналдың әлеуметтік-тұрмыстық жағдайын жақсарту бағытында еңбек қорғау бойынша кешенді шаралар қабылдаған кәсіпорын жылдың соңына дейін тағы үш үй сатып алуды жоспарлап отыр.