Қазалыда жол жөндеу жұмыстары жалғасып жатыр

Қызылорда магистральдық желі бөлімшесінің Қазалы жол дистанциясы ауа райының аса қолайсыз, аптап ыстығына қарамастан жолдың ағымдық күтімін жасап жатыр. Әрине басшылықтың арнайы бұйрығымен белгіленген жұмыс сағаты аясында.

Бүгін де таңғы салқынмен жұмысты өндіріп алуды жоспарлаған жолшылар ерте  іске кірісті. Сағат сегіз болмай бекеттің солтүстік алқымындағы сары жилет кигендер қыбырлап жүрді. Өздері үшін күнделікті қатардағы шаруа саналатын бүгінгі жұмыс көне ағаш белдемелерді жаңа белдемелермен алмастыру екен.  Әне, жол табанындағы белдемелердің астын Нұрдәулет Мұратбекәлі мен Қанат Бабақ күрекпен қазып алу арқылы босатып жатса, екінші топ оның орнына жаңа ағаш белдемелерді дайындап сала бастады. Дәулет Меңделбаев жұмыс кезінде  электрожетекке залал келмес үшін жетек маңын мұқият қазып орнына тас төсеуде, ал тағы бір жолшы қолына ұстаған балғасымен белдемеге бекітпелерді құлаштап ұрып кіргізіп жатты...  

Ал осы жасалып жатқан жұмыстардың барлығының технологиялық талапқа сай жасалуын дистанцияның жол шебері Сахи Ахметұлы қадағалып, әріптестерімен бірге бүгінгі күннің алғашқы тапсырмасын жасауда.

– Бекеттің солтүстік алқымындағы станциялық 28 жолдың көне ағаш белдемелерін жаңасымен ауыстыруға тапсырма берілгендіктен жанымдағы әріптестеріммен бүгін осы жұмысты атқарып жатырмыз. Бұл біздің жолдарды күнделікті ағымдық күтімде ұстау барысында атқаратын қатардағы жұмыстың бірі болып саналады, күрделі ештеңе жоқ. Дегенмен сақтық шараларын сақтап, технологиялық талаптардың қатаң сақталуын естен шығармаймыз. Жалпы жолшы деген жылдың қай мезгілі, қандай ауа райы болмасын тәулік бойы жол бойында жолдың бабын жасайтын халық қой, сондықтан кез келген күтімдік жұмыстар үйренген қолмен тез және сапалы атқарылады, тәжірибе бар ғой, – дейді жол шебері Сахи Ахметұлы.

Ағымдық күтім жұмыстары электр желілері мен бағыттамалық бұрма, бағдаршамдар секілді құрылғылар маңында жасалып жатқандықтан ШЧ, ЭЧ сынды оларға жауапты мекемелер өкілдері де жолшылармен бірге осы жерде жүр.