Шымкентте өткел құрылысы басталды
Түркістан облысы бойынша меншікті тілші
Шымкент іргесіндегі Қызылсай елді мекеніңде темір жолдан өтетін жол құрылысы басталды.
Жұмыс қарқынды жүруде, өткел құрылысын жүргізіп жатқан компания техника мен адам күшін жеткілікті жұмылдырған. Сонымен қатар жер жұмыстары және инженерлік желілерді қайта орнату іске асырылуда.
«Қала орталығына бару үшін бұрын айналып өтетін жолмен жүретінбіз. Ауа-райы қолайсыз мезгілдерде жедел жәрдемнің қатынауы өте қиын. Біз үшін бұл өте қуанышты жаңалық», – дейді тұрғындар.
Құрылыс қала әкімі бекіткен іс-шаралар жоспарына еніп отыр. Өткен аптада қала әкімі Мұрат Әйтенов Қызылсай тұрғын алабында жүріп жатқан жол құрылысымен танысып, ертерек бітіруге нұсқау берді. Құрылыс аяқталған соң тұрғындар сапалы жолмен толық қамтамасыз етіліп, қалаға тиімді қатынауына және қауіпсіз қозғалуына мүмкіндік алатынын жеткізді.