Семейде ескірген шпалдар ауыстырылып жатыр
Абай облысы бойынша меншікті тілші
Бүгінде Семей ЖТ бөлімшесі бойынша қызу қарқынмен жүргізіліп жатқан жазғы жұмыстардың бірі – ескірген шпалдарды ауыстыру. Бұл орайда көктемнен бері қарай уақыты өткен шпалдарды жаңа темірбетонды түріне ауыстыру жұмыстары үзіліссіз атқарылып келеді.
Аталмыш бағыттағы шаралар ПЧ-39, ПЧ-40 және ПЧ-42 мекемелері телімдерінде жүргізіліп жатыр. Бұл ретте желі бойында «ЖЕЙСМАР» жол машинасы жүйелі жұмыс жүргізуде. Қазіргі таңға дейін жалпы саны 4935 бірлік шпал жаңартылған екен. Бұл шаралар бойынша Семей жол дистанциясының жолшылары ерлеп келеді. Олар қазіргі таңда 3802 шпалды жаңасына ауыстырыпты.
Айта кетерлік бір жайт, осы ретте кірме жолдар мен тұйық желілер де назардан тыс қалдырылмаған. Ұзақ жылдар бойы жеке меншіктің қолында болып, мүлде жөндеу көрмеген көмір тұйықтары теміржолшылар қолымен жаңа кейіпке еніп жатыр. Соның бір мысалы ретінде облыс орталығы Семей қаласында орын тепкен РК-3 жылу қазандығына апаратын теміржол желісін атауға болады. Оның бұрынғы иесі мүлде көңіл бөлмеуі себепті жол жарамсыз күйге айналған. Тіпті, кейбір бөліктеріндегі рельстердің өзі қолды болған. Ендігі аралықта аталмыш тармақ толыққанды түрде қайта жаңғыртылды. Семей жол дистанциясы теміржолшылары бастан-аяқ жөндеп, шпалдарын қайта ауыстырып шықты. Бірінші қыркүйекке дейін мұнда жалпы саны 220 шпал салыныпты.
Желінің жарамсыз болуы себепті осыған дейін мұнда қатты отын жүк машиналарымен жеткізілетін-ді. Жай күндердің өзінде 60-80 көлік қатынауы тиіс болатын. Енді үлкен шығын мен күшті, уақытты талап ететін жұмыс әлдеқайда жеңілдеді. Көмір вагонмен жеткізілетін болады.
Аталмыш бағыттағы жүргізілген шараларды алдағы келе жатқан жылу маусымына даярлық шаралары аясында бөлімше басшысы, Абай облыстық мәслихатының депутаты Владимир Бабиченко өзі назарда ұстаған болатын.