«Бақты-Аягөз» теміржол желісімен жылына 7,8 млн тонна жүк тасымалданбақ
Абай облысы бойынша меншікті тілші
Президент тапсырмасы аясында «Қуатты өңірлер – ел дамуының драйвері» ұлттық жобасы шеңберінде көршілес Қытай елінен транзиттік ағындарды ұлғайту үшін бірқатар жобалар қолға алынғаны белгілі. Биылғы жылы «Бақты-Аягөз» теміржол желісі құрылысының техникалық-экономикалық негіздемесі әзірленді.
Оның нәтижесі бойынша жобаның бағалау құны 321 млрд теңге болып отыр. Ал еліміз бойынша аспан асты еліне жол тартатын желінің жалпы ұзындығы 270 шақырым болып белгіленді. Құрылысты іске асыру кезеңі 2024-2025 жылдарға жоспарлануда.
Жоба аясында Семей ЖТ бөлімшесі мен Абай облысының әкімдігі бірлескен іс-шаралар жүргізуде. Желі бойындағы жер учаскелерін мемлекет қажетіне орай резервтеу бойынша жұмыстар атқарылды. Сәйкесінше, аймақтағы республикалық, облыстық, аудандық маңызы бар автомобиль жолдарымен қиылыстар да келісілді.
Жалпы, «Бақты-Аягөз» жаңа теміржол желісі жобасын іске асыру бойынша арнайы жол картасы әзірленіп, бекітілді.
Сонымен қатар 2030 жылға дейін «Бақты-Аягөз» теміржол желісі бойынша жүктерді тасымалдау көлемінің маркетингтік болжамы анықталды. Ол жылына 7,8 млн тонна деп бағаланып отыр. Оның ішінде Беларусь жүктерінің көлемі шамамен 3 млн тоннаны, Ресейге тасымалданатын жүктердің көлемі – 2,7 тоннаны, ал қазақстандық жүктердің көлемі 2,1 млн тоннаны құрайды екен. Бұл ретте ежелгі Жібек жолы бойында орналасқан Бақты кеден бекеті Қытайдың Еуропаға ашылған терезесі саналатынын да айта кеткен орынды.
Жаңа желінің салынуы аймақтағы транзиттік-логистикалық салаға жан бітіреді. Соның аясында «Бақты-Аягөз» теміржол учаскесінің құрылысын ескере отырып, Бақты шекаралық өткізу пунктінің жанынан дәл «Қорғас – Шығыс қақпасы» арнайы экономикалық аймағы тәрізді «Құрғақ порт» жобасын салу және Семей қаласынан көлік-логистикалық орталық құрылысын салу межеленуде. Бұл да Президент Жолдауы аясындағы негізгі тапсырмалардың қатарына жатады.