Қызылордада теміржол сапасы артып келеді

Қызылорда жол дистанциясына қарасты жол телімінің сапасы қанағаттанарлық. Оған өткен жылы атқарылған бірқатар жаңғырту жұмыстарының да септігі тигені сөзсіз.    

Мәселен, Белкөл және Шиелі станцияларында 4 қосалқы жолға күшейтілген жөндеу жұмыстары ПЧМ-Ағадыр мекемесі техникаларының күшімен жасалып, ескі Р50 типті рельстер Р65 типті рельстермен ауыстырылды. 18 жаңа бағыттамалық бұрма темірбетон сырғауылдарымен, ескі болса да жарамды 11 бағыттамалық бұрманың темір бөлшектері ауыстырылған, оның ішінде 5 бұрма Р50 типті рельс Р65 типті рельске жаңартылған. 37 шақырым жол бойы малға қарсы қоршаулар тікенек сыммен қосымша қоршалып, 13,8 шақырым қоршауға жөндеу жұмыстары жүргізілген.  

– Биылғы жылы дистанция бойынша 23 шақырымға: Қараөзек-Қызылорда-Белкөл, Шиелі-20-бекет, Аққұм-Екпінді-Талап станциялары аралықтарында күрделі жөндеу жұмыстары жасалады деп жоспарланып отыр. Және де телімдерде 16 жинақ бағыттағыш бұрма темірбетон сырғауылдарымен ауыстырылады. 6 жинақ бағыттағыш бұрманың металл бөліктері Р50 типтен Р65 типті рельстерге ауыстырылады, станциялардың 10 шақырымдық жолдарында күшейтілген жөндеу жұмыстары жүргізіліп, ол жерлердегі Р50 типті рельстер Р65 типті ескі жарамды рельстермен ауыстырылады. Осының бәрі биылғы жұмыс жоспарына ұсыныс ретінде енгізіліп, бекітілді, – дейді дистанцияның техникалық бөлімінің жол инженері Ахметқали Елеусінов.

Жолшылар ұжымы жолды күнделікті, ағымдық, жоспарлы күтіп-баптауда технологиялық талаптарды толық сақтай отырып жұмыстарын кәсібилікпен  жүргізуде. Күрделі жөндеу көлемі де артуда. Нәтижесінде жол сапасы жылдан жылға артып келеді.