Теміржол өткелдерінде жол белгісі жаңарады

Маңғыстау жол дистанциясы бойынша биыл теміржол өткелдеріндегі біраз жол белгісі жаңармақ. Оған қоса кейбірлеріне бейнебақылау құрылғысы қойылуы ықтимал. Бұл өткелдердегі жол-көлік оқиғасының алдын алуға оң ықпал етпек. 

Дистанция инженерінің сөзіне сүйенсек, былтыр жалпы еліміздегі теміржол өткелдерінде 25 жол-көлік оқиғасы тіркеліпті. Ал Маңғыстау жол дистанциясы аумағындағы өткелдерде өткен жылдың бастапқы екі айында екі рет осындай жағдай кездесіпті. Қуантарлығы, биылғы жылдың екі айында мұндай деректер тіркелмеген. Алайда бұл арқаны кеңге салып, жайбарақат отыруға болады деген сөз емес. Осыны ескерген жолшылар жол-көлік оқиғасының алдын алудың қарекетінде. Автокөлік жүргізушілерімен кездесіп, жол-көлік ережесін түсіндіру жұмыстарын жалғастырып жатқанын айтады. Жергілікті полиция инспекторларымен бірлесе екі айда 160 көлік жүргізушісіне осы тұрғыдан түсінік жүргізіпті. Жол дистанциясы мен байланыс және белгі беру, электрмен жабдықтау дистанциялары бірлесе теміржол өткелдерін тексеріпті. 

• Теміржол өткеліне көлік шыққан немесе соған ұқсас басқа да жағдайлар болған кезде жоғары жылдамдықпен, қаншама вагонмен келе жатқан пойыздың бірден тоқтауы қиын. Сондықтан мұндай оқыс оқиғаны болдырмау үшін автокөлік жүргізушілеріне темір жолмен қиылысатын тұсына келгенде аса сақтықпен, асықпай, пойызға жол бере отырып қана қозғалу қажеттігін ескертеміз. Мұндай профилактикалық жұмыстарды қаңтар және ақпан айларында жергілікті полиция қызметкерлерімен бірлесе Маңғыстау, Мұнайлы, Қарақия аудандары мен Жаңаөзен қаласында өткіздік. Тағы да жалғасатын болады, – дейді Маңғыстау жол дистанциясының жетекші жол инженері Мұхтар Кульчанбаев. 

Алдағы уақытта Шетпе станциясындағы 314, 305 шақырым, Маңғыстау станциясындағы 2, 13, 399-шақырым, Жаңаөзен қаласы бойынша 179, 181 шақырымдардағы күзетпелі теміржол өткелдеріне жолдағы кез келген жағдайды дұрыс көрсететін арнайы бейнебақылау құрылғысын орнату қарастырылуда.  Сондай-ақ биыл Маңғыстау және Шетпе станцияларының теміржол өткеліне УЗП құрылғысын орнату жоспарда бар екен. Басқа да өткелдердегі «STOP» белгісі мен бір жолақты, көп жолақты теміржол өткелі белгісін ауыстыруға ұсыныстар жасалған. Дистанция аумағындағы 34 өткелдің көбінде осы белгілер ескірген. Енді олардың орнын жаңалары алмастыратын болады.