Қызылордада бағыттамалы бұрма ауыстырылды

Өткен аптада Қараиірім және Тереңөзек станцияларында екі бағыттамалық бұрманы ауыстыру жұмысы атқарылды. Қызылорда жол дистанциясы мен Қызылорда қалпына келтіру пойызының теміржолшылары бірлесе жұмыс істеп, толаскез уақытын ұтымды пайдалана білді.

Осыған дейін Аққұм-Талап учаскесінде күрделі жөндеуді бастап, Шиелі станциясында бағыттамалық бұрмаларды ауыстырып үлгерген жолшылар көктем шыға жоспарлы жұмыстарын үдетті.  

– Бағыттамалық бұрмаларды ауыстыру – жоспарлы жұмыс. Сондықтан оған алдын ала дайындалып, толаскез уақытын қозғалысшылармен келісіп кірісеміз. Қараиірім бекетінде №1 және Тереңөзек станциясында 8-бағыттамалық бұрманы ауыстыру жұмысы Қалпына келтіру пойызындағы әріптестерімізбен бірге белгіленген уақыт ішінде сәтті аяқталды. Бұл өз кезегінде телімде қозғалыс қауіпсіздігі мен сенімділігін арттыруға сеп болмақ, – дейді Қызылорда жол дистанциясының бастығы Марат Оңалов.  

Бағыттамалық бұрмаларды ауыстыру жұмысына Қызылорда қалпына келтіру пойызының баспаналық модулі, ЕДК-300/2 жүк көтергіш краны, жол техникалары, такелажка және жаңа темірбетон бағыттамалық бұрмалар тиелген платформалар қолданылды. Берік Әбжаппаров басқаратын қалпына келтіру пойызының теміржолшылары толаскезге алдын-ала дайындық барысында пойыз құрамының жұмыс басында орналасуын межелеп, бағыттамалық бұрма бөлшектерінің көтергіш кранның көмегімен түсіріліп-тиелуін бағдарлап, жұмыс жоспарын бекітіп алған. Сонымен қатар басқа да салалық мекемелердің теміржолшылары атсалысып, өз салаларындағы жұмысты қадағалады. Вагон қараушылар тепловоз бен вагондардың ажыратылып-жегілуіне жауапты болса, электр қуатының уақытылы, кідіріссіз берілуі, сигнал беру және байланыс құрылғыларының техникалық талап бойынша жалғануы, бекеттегі қозғалыстың кестеге сай атқарылуы секілді жұмыстар тиісті мекеме мамандары арқылы атқарылды.  

– Төрт бөліктен тұратын және әрқайсысы 10-12 тонналық бағыттамалық бұрмалар рет-ретімен тарқатылып алынып, оны платформаға кран машинисі Ж. Жүрсінов пен кран машинисінің көмекшісі Ж. Абдрашитов тиеп-түсірді, жаңа бұрманың төселуі үшін жол табанын бульдозер машинисі Дәулет Балманов тегістеп шықты. Осылай бір-бірімізге көмектесіп нәтижелі жұмыс атқардық ,– деді Қызылорда қалпына келтіру пойызының бастығы Берік Әбжаппаров.  

Толаскез барысы Магистральды желі бөлімшесі басшыларының қадағалауы және мамандардың бақылауымен жүргізілді.