Керекуде жол жөндеу жұмыстары қызу жүріп жатыр
«Қазақстан теміржолшысы» газетінің тілшісі
Кереку өңірінде жазғы жол жұмыстары қызған. Бүгінгі таңда Павлодар магистральды желі бөлімшесіне қарасты Тасқұдық – Спутник – БП-415 учаскесіндегі ұзындығы 19,3 шақырым жолды күрделі жөндеу жұмыстары аяқталуға жақын.
Жөндеу жұмыстарын Ағадыр машиналандырылған жол дистанциясы жүргізуде, вахталық әдіспен жұмыс істеп жатқан өндірістік құрам қатарында жол бригадирлері, жол слесарлары, пойыздарды құрастырушылар, сигналшылар, кран машинистері және тағы басқа еңбек адамдары бар.
Жұмысқа екі УК-25 краны жұмылдырылған, бірі ескі рельс пен шпал торкөздерін бөлшектесе, екіншісі жаңа темірбетонды шпалдардан құрастырылған рельсті-шпал торкөздерін төсеумен айналысуда, бұл жұмыс су жаңа УК-25/25 кранына жүктелген. Осы арада, айта кететін жайт, темір жолдарға жүргізілетін күрделі және тағы басқа жөндеу түрлері бойынша жұмыстардың өнімділігін арттыру үшін биыл Компания тарапынан УК-25/25 төсеуші краны мен МПК моторлы платформалар сияқты ауыр типті жол машиналары сатып алынуда.
Бүгінде УК-25 кранының 4 бірлігі сатып алынып, оның үшеуі қолданысқа берілген. Ал жоспарланған 8 бірлік МПК моторлы платформаның бүгінде 6-уы жеткізіліп, төртеуі жұмысқа жұмылдырылған. Қалған екі техника жақын күндері зауыттан жеткізіледі деп күтілуде. Ал УК-25/25 кранының алдыңғыларынан басты артықшылығы- жүк көтергіштігі 19 тоннадан 25 тоннаға дейінгі салмақты құрайды, сондай-ақ, оны екі адамның орнына бір адам басқара алады және қашықтықтан басқару пульті арқылы жерден басқару мүмкіндігі бар. Ал моторлы платформаның бұрынғылармен салыстырғанда ерекшелігі, басқару кабинасы бар, бұл өз кезегінде, қызмет көрсетуші персоналдың жұмыс қауіпсіздігін сақтап, еңбек жағдайын жақсартып отыр дейді Магистральдық желі дирекциясының мамандары.
Павлодар магистральдық желі бөлімшесінің маманы Дәурен Қабдуллиннің айтуынша, Бозщакөл – Өлеңті учаскесінде 12,057 км жолда күрделі жөндеу жұмыстары аяқталған, оны мердігер «Темір жол жөндеу» ЖШС қарасты Астана ПМС жүргізген екен. Екібастұз жол дистанциясы бойынша 4 км, Павлодар жол дистанциясы бойынша 17,5 км көлемінде жолды жөндеу жұмыстары аяқталған.
Өңірде жол шаруашылығы жұмысшыларының өз күшімен жоспарланған 61 жиынтықтың бұрманың 10 жиынтығы ауыстырылған.
«Ақсу-1»-де станцияның өткізу қабілетін арттыру үшін техникалық қайта құрылымдау жұмыстары жүргізілуде. Қайта құрылымдаудың 2-кезеңінде темірбетонды негіздегі 5 бағыттағыш жиынтық жолға төселсе, сонымен қатар 4 станциялық жолды ұзарту және 3 жиынтық бағыттағыш бұрма салу жоспарланған.
Алдағы күн жоспарында Павлодар жол дистанциясы қызмет көрсететін Павлодар станциясы бойынша 7,3 км көлеміндегі орташа күшейтілген жол жөндеу жұмыстарын орындау бар. Ал Екібастұз жол дистанциясы бойынша ОП-116 – Шідерті тақ жол учаскесінде 7,3 км көлемінде рельс тіректерін (жаңа темірбетон шпалдарын) толық ауыстыру жұмыстары жоспарланып отыр.