Елімізде 2030 жылға дейін 180-нен астам теміржол станциясы жаңғыртылады
ҚТЖ-да қолданыстағы теміржол инфрақұрылымының өткізу қабілетін арттыру бағдарламасы іске асырылуда, деп хабарлайды Rail-news.kz.
Жолаушылар мен жүк тасымалдарына қажеттіліктің өсу серпінін, транзиттік жүк ағынының ұлғаюын ескере отырып, темір жолдардың жаңа учаскелерін салумен қатар 180-нен астам теміржол станциясының өткізу және өңдеу қабілетін дамыту жоспарлануда.
Қосымша разъездер, қабылдау-жөнелту жолдары мен диспетчерлік қосымша жолдар салынады, қолданыстағы жолдар ұзартылады және бұрын бөлшектелген жолдар қалпына келтіріледі.
2024 жылдың басынан бастап жер учаскелерінің қосымша алаңдарын келісу және ресімдеу, жобалау-зерттеу жұмыстарын жүргізуге тиісті рұқсаттар алу, уәкілетті органдардың қорытындылары (сәулет – жоспарлау тапсырмалары, экологиялық сараптамалар, авиациялық рұқсаттар, су-бассейндік инспекциялар және т.б.) бойынша жұмыстар басталды.